پنجاب میں اشتہاری ملزموں کیخلاف کریک ڈاؤن شروع
لاہور.......پنجاب کابینہ نے اپنے پہلے اجلاس میں محکمہ بلدیات کا تمام ریکارڈ سیل کرکے اس کا آڈٹ کرانے اور امن و امان کے قیام کے لئے کریک ڈاؤن کے فیصلے کئے ہیں،جبکہ شادی بیاہ میں ون ڈش پرسختی سے عملدرآمد کا حکم دیا گیا ہے۔پنجاب کابینہ کا پہلا اجلاس وزیر اعلیٰ پنجاب دوست محمد کھوسہ کی زیر صدارت لاہور میں ہوا۔جس کے بعد وزیر قانون رانا ثنااللہ اور وزیر خزانہ تنویر اشرف کائرہ نے بریفنگ دیتے ہوئے کہا کہ بلدیاتی اداروں میں پچھلے دونوں ادوار میں بے پناہ کرپشن کی گئی اس لئے بلدیاتی اداروں کا ریکارڈ سیل کر کے ان کا آڈٹ کرانے کا فیصلہ کیا گیا ہے تاہم جاری ترقیاتی منصوبے نہیں روکے جائیں گے ، انہوں نے کہا کہ امن و امان کی صورتحال بہتر بنانے کے لئے صوبے بھر میں اشتہاری ملزموں کی گرفتاری کے لئے کریک ڈاؤن کیا جائے گا اور خصوصاً چوہدری برادران کے آبائی شہر گجرات کو فوکس کیا جائے گا کیونکہ یہ شہر اشتہاریوں کی جنت بنا ہوا ہے، انہوں نے بتایا کہ گندم اور آٹے کے ذخیرہ اندوزوں کے خلاف آپریشن کیا جائے گا ،جبکہ ہوٹلوں اور شادی ہالوں کو وارننگ دی گئی ہے کہ شادی بیاہ میں ایک سے زائد ڈش پیش کرنے پر انکے خلاف سخت کارروائی ہو گی ،کابینہ نے نگران حکومت کی طرف سے تبادلوں کا ریکارڈ بھی طلب کیا ہے۔

__________________