لاہور۔۔۔۔حکومت پنجاب نے محرم الحرام میں امن وامان کی صورتحال بہتر رکھنے کے لئے ڈبل سواری پر پابندی عائد کرتے ہوئے رینجرز طلب کر لی ہے اورفوج کوہائی الرٹ رہنے کی ریکوزیشن دے دی ہے۔ سیکرٹری داخلہ پنجاب خسرو پرویز خان نے جیونیوز کے نمائندے امین حفیظ سے گفتگو کرتے ہوئے کہا کہ حکومت نے یکم محرم الحرام سے ہی پنجاب بھر میں موٹر سائیکل پر ڈبل سواری پر پابندی عائد کردی ہے اوررینجرزکے دستے طلب کر لئے ہیں۔ اس کے علاوہ وزارت داخلہ سے کہاگیا ہے کہ حکومت پنجاب کہیں بھی کسی بھی مقام پر ایک گھنٹے کے نوٹس پر فوج طلب کر سکتی ہے۔ مجالس میں داخل ہونے والے تمام افراد کی میٹل ڈٹیکٹر کے ذریعے تلاشی لینے کا حکم بھی دیا گیا ہے۔سیکرٹری داخلہ پنجاب کا کہناتھا کہ وہ عوام کے جان ومال کا تحفظ یقینی بنانے کے لئے ہر ممکن اقدامات کریں گے۔