پنجاب:پی پی ، ن لیگ میں مصالحتی محاذ آرائی جاری
لاہور: پنجاب میں پاکستان پیپلزپارٹی اور مسلم لیگ ن کا مل کر چلنا نہ صرف دونوں جماعتوں کے مفاد میں ہے بلکہ دونوں کی سیاسی مجبوری بھی ہے۔ مرکز میں حکومت کے قیام اور پرویز مشرف کی رخصتی تک مسلم لیگ ن پیپلزپارٹی کے ساتھ رہی لیکن صدارتی انتخابات کے مرحلے پر اپنی سیاسی بقا کیلئے مسلم لیگ ن نے اپنے راستے جدا کرلئے۔

صدارتی انتخابات کے بعد پنجاب میں سیاسی تبدیلی کی قیاس آرائیاں زور پکڑ گئیں۔ پنجاب کے گورنر سلمان تاثیر کے بیانات سے تلخی کا تاثر ابھرا اس دوران آصف علی زرداری کی طرف سے کشیدگی سے گریز کے اشارے بھی ملے لیکن گورنر پنجاب نے چوہدری برادران سے ملاقات کی ہے جس سے مصالحتی کہانی کے رنگ پھیکے پڑنے لگے ہیں۔

ذرائع کے مطابق اس ملاقات میں پنجاب میں حکومت سازی پر بھی غور کیا گیا۔ سیاسی حلقوں کا کہنا ہے کہ مرکز میں مضبوط حکومت کے باوجود پیپلزپارٹی کیلئے پنجاب میں مسلم لیگ ن کی حکومت ہٹانا آسان نہیں، پیپلزپارٹی اور مسلم لیگ ن کی اعلیٰ قیادت کے مصالحانہ عزم کے باوجود پنجاب میں محاذآرائی بدستور جاری ہے۔