پنجاب میں تاحکم ثانی صنعتوں کو گیس کی فراہمی بند کر دی گئی ہے۔ صنعتوں کے مالکان کا کہنا ہے کہ اگر یہی صورت حال برقرار رہی تو دیہاڑی دار مزدور کے گھر میں فاقے شروع ہو جائیں گے اور رہی سہی انڈسٹری کا بھٹہ بیٹھ جائے گا۔ صنعت کاروں نے یہ انتباہ بھی کیا ہے کہ صنعتوں کو سپلائی بند ہونے سے امن و امان کا مسئلہ بھی پیدا ہوسکتا ہے۔
گیس کا دبائو کم ہونے اور سردی بڑھنے کے ساتھ ہی گھریلو صارفین کے لئے بھی مشکلات کھڑی ہوگئی ہیں اور بعض علاقوں میں محض اتنی گیس آرہی ہے جس سے صرف ''دم'' لگایا جاسکتا ہے۔ دوسری جانب سی این جی پمپوں پر بھی گیس کا پریشر بہت ہے۔ پانچ سو روپے کی گیس ڈلوائیں تو وہ عملاً اڑھائی سو روپے کی نکلتی ہے۔ صنعتوں کی بندش سے لاکھوں مزدور بے روزگار ہو جائیں گے اور صنعت کار ٹھیک کہتے ہیںکہ ان کے گھروں میں فاقے ڈیرے ڈال دیں گے۔
کیا حکومت اس مسئلے سے نمٹ پا ئے گی؟ ہمارے خیال میں نہیں کیونکہ ایک دو بارشیں ہوگئیں تو یہ مسئلہ زیادہ شدت اختیار کر جائے گا اور ہر حوالے سے معیشت پر ضرب لگے گی۔ گاڑیوں کے لئے سی این جی نہ ہونے سے پہیہ بڑی حد تک جام ہو جائے گا۔ صنعتیں بند ہونے سے لاکھوں مزدوروں کے گھروں کا چولہا ٹھنڈا پڑجائے گا اور گھریلو صارفین کو یا تومٹی کا تیل جلانا پڑے گا یا ایل پی جی گیس کے سلنڈرز لینے پڑیں گے۔ یعنی زندگی کا ہر شعبہ متاثر ہوگا اور حکومت گزشتہ سال کی طرح اس سال بھی کچھ نہ کر پائے گی۔

__________________
جاویداسد