پنڈی حملے کے بعد فوجی افسران کی سکیورٹی کیلئے غیرمعمولی اقدامات
راولپنڈی (مظہرطفیل) راولپنڈی میں مال روڈ پر خودکش حملے میں لیفٹیننٹ جنرل سرجن مشتاق کی شہادت کے بعد پاک فوج نے مسلح افواج کے افسران کی سکیورٹی میں غیرمعمولی اضافہ کر دیا ہے۔ آئی ایس پی آر کے ایک سینئر افسر نے ”دی نیوز“ کو بتایا کہ سکیورٹی کیلئے بعض غیرمعمولی اقدامات کئے گئے ہیں اور مسلح افواج کے ملازمین کو ان اقدامات پر فوری عملدرآمد کیلئے ہدایات بھی جاری کر دی گئی ہیں۔ ذرائع نے بتایا کہ یہ اقدامات پہلے سے موجود مسلح افواج کے سکیورٹی پلان کا ہی حصہ ہیں اور اس وقت صرف اس منصوبے پر سختی سے عملدرآمد کی ہدایات جاری کی گئی ہیں۔ دیگر فوجی ذرائع کے مطابق تمام میسوں کو چوکنا رہنے کی ہدایت کی گئی ہے اور یہاں سویلین کا داخلہ سختی سے بند کر دیا گیا ہے۔ پنڈی حملے کے بعد یہ بات واضح ہوگئی ہے کہ دہشتگرد پاک فوج کے اہلکاروں کو خاص طور پر نشانہ بنا رہے ہیں۔ آرمی کے علاقوں کے علاوہ نیوی، ایئرفورس کے رہائشی کوارٹرز اور دکانوں میں بھی سویلینز کا داخلہ مکمل طور پر بند کر دیا گیا جبکہ اندر اور باہر آنے والے راستوں پر شناخت کے بغیر کسی بھی شخص یا گاڑی کو ان علاقوں میں داخل نہیں ہونے دیا جائے گا۔ دریں اثناء فوجی ذرائع نے اس بات کی تردید کی ہے کہ خودکش حملہ آور کی شناخت کرلی گئی ہے۔ ذرائع کا کہنا ہے کہ اس پر کام ابھی جاری ہے جس میں ڈی این اے اور چہرے کی سرجری کا سہارا بھی لیا جا رہا ہے۔ ابھی تک صرف ایک ہی سراغ ملا ہے کہ خودکش حملہ آور گوری رنگت کا تقریباً 20سالہ نوجوان تھا۔

__________________