پولیس، عوام رابطے بہتر کئے جائیں گورنر، صوبائی وزیر داخلہ سے گفتگو
کراچی( اسٹاف رپورٹر) گورنر سندھ ڈاکٹر عشرت العباد خان نے کہا کہ پولیس اور عوام کے مابین رابطوں کو بہتر بنایا جائے، امن و امان کا قیام اور لوگوں کی جان و مال کے تحفظ کیلئے بلا تفریق و دباؤ کوششیں گڈ گورننس اور ہر حکومت کی اولین ترجیحات میں شامل ہوتا ہے۔ وہ صوبائی وزیر داخلہ ڈاکٹر ذوالفقار مرزا سے بات چیت کر رہے تھے جنہوں نے گورنر ہاؤس میں ان سے ملاقات کی ۔ اپنا عہدہ سنبھالنے کے بعد گورنر سے اپنی پہلی ملاقات میں انہوں نے گورنر کو صوبے میں امن و امان کے قیام اور پولیس ریفارمز کے سلسلے میں اپنی ترجیحات اور لائحہ عمل سے آگاہ کیا۔ انہوں نے امید ظاہر کی کہ اس ضمن میں انہیں ہمیشہ گورنر کا تعاون حاصل رہے گا۔ گورنر نے اس موقع پر پولیس ویلیفئر کے منصوبوں کو سراہا اورصوبائی وزیر داخلہ کو اپنے ہر ممکن تعاون کا یقین دلایا۔

__________________