درجہ بندی: (1 votes - 5.00 average)

اس ویڈیو میں پولیس اہلکاروں کو کسی پہاڑی مقام پر ایک قطار میں کھڑا دکھایا گیا ہے

پاکستانی فوج کا کہنا ہے کہ طالبان کی جانب سے سولہ پاکستانی پولیس اہلکاروں کے قتل کی جاری کی گئی ویڈیو فوٹیج اصل ظاہر ہوتی ہے۔

پاکستانی فوج کے ترجمان میجر جنرل اطہر عباس نے کہا ’وہ بے رحم دہشت گرد ہیں اور یہ ہی وہ خطرہ ہے جس کا ہم مقابلہ کر رہے ہیں۔ القاعدہ اور اس کے اتحادیوں کے ہاتھوں ہمیں سب سے زیادہ نقصان اٹھانا پڑا ہے ۔۔۔ لیکن ساتھ ہی پاکستان نے ہی سب سے زیادہ ان کا مقابلہ بھی کیا ہے۔‘

کلِک چار سو کا مقابلہ تیس نے کیا

متبادل میڈیا پلیئر چلائیں

واضح رہے کہ پاکستان کے صوبہ خیبر پختون خوا کے ضلع اپر دیر میں جون کے مہینے میں ہونے والے اس حملے میں حکام نے تصدیق کی تھی کہ ستائیس سکیورٹی اہلکاروں سمیت اکتیس افراد ہلاک ہوئے۔ مرنے والوں میں چار عام شہری بھی شامل تھے۔

طالبان نے یہ ویڈیو چند روز پہلے جاری کی تھی جس کے اصل ہونے کا پاکستانی فوج جائزہ لے رہی تھی۔

بی بی سی نامہ نگار علیم مقبول کا کہنا ہے کہ اس ویڈیو میں پولیس اہلکاروں کو کسی پہاڑی مقام پر ایک قطار میں کھڑا دکھایا گیا ہے جن کے ہاتھ پشت پر بندھے ہیں اور مسلح افراد ان کے سامنے کھڑے ہیں۔

ویڈیو میں دکھایا گیا ہے کہ مسلح افراد پہلے پولیس اہلکاروں کو برا بھلا کہتے ہیں اور پھر ان پر فائرنگ شروع کر دیتے ہیں۔

وہ بے رحم دہشت گرد ہیں اور یہ ہی وہ خطرہ ہے جس کا ہم مقابلہ کررہے ہیں۔ القاعدہ اور اس کے اتحادیوں کے ہاتھوں ہمیں سب سے زیادہ نقصان اٹھانا پڑا ہے ۔۔۔ لیکن ساتھ ہی پاکستان نے ہی سب سے زیادہ ان کا مقابلہ بھی کیا ہے
ترجمان، پاکستانی فوج

ویڈیو کے ساتھ ایک عبارت بھی جاری کی گئی ہے جس میں کہا گیا ہے کہ افغانستان کی سرحد پار کر کے پاکستانی اپر دیر کے علاقے میں ایک پولیس چوکی پر حملے کے دوران اِن پولیس اہلکاروں کو اغواء کیا گیا تھا۔

اِن پولیس اہلکاروں کی لاشیں بعد میں مقامی افراد کو مل گئی تھیں۔ بی بی سی کو موبائل فون پر ایک فوٹیج موصول ہوئی جس میں دکھایا گیا ہے کہ دِیر میں مقامی افراد کو پولیس اہلکاروں کی لاشیں ملی ہیں۔

سوات طالبان کے ترجمان عمر حسن اہرابی نے سکیورٹی فورسز پر حملے کی ذمہ داری قبول کرنے کا دعویٰ کیا تھا۔انہوں نے کہا تھا کہ اس لڑائی میں ان کا بھی ایک جنگجو مارا گیا جبکہ دو زخمی ہوئے۔

پاکستانی فوج کو یقین ہے کہ یہ حملہ سوات سے تعلق رکھنے والے پاکستانی طالبان نے کیا تھا جو سوات آپریشن کے دوران افغانستان کی جانب فرار ہوگئے تھے۔

چند روز پہلے پاکستانی فوج کا کہنا تھا کہ افغان صوبے کنٹر اور نورستان کالعدم تحریک طالبان پاکستان کا گڑھ بن چکے ہیں اور وہاں سے طالبان پاکستانی علاقوں میں حملے کر رہے ہیں۔

__________________