پولیس نے لوٹے گئے 45 کروڑ سے زائد مالیت کے سرٹیفکیٹ برآمد کر لئے



لاڑکانہ(بیورورپورٹ) لاڑکانہ پولیس نے 27دسمبر کی رات شہر کے ایک سیونگ سینٹر سے لوٹے جانے والے 45 کروڑ 18لاکھ 27ہزار روپے مالیت کے مسروقہ سیونگ سرٹیفکیٹ برآمد کرلئے جبکہ 6 کلاشنکوف سمیت بڑی مقدار میں لوٹا جانے والا اسلحہ بھی بازیاب کیا گیا ہے۔معلوم ہوا ہے کہ 27دسمبر کو احتجاج کی آڑ میں مختلف بینکوں، سیونگ سینٹروں اور اسلحے کی دوکانوں سے لوٹے گئے سامان کی بازیابی کے لئے لاڑکانہ پولیس نے گرینڈ آپریشن شروع کردیا ہے۔ آپریشن کی نگرانی ڈی پی او لاڑکانہ غلام رسول ڈومکی کررہے ہیں۔جمعے کو لاڑکانہ کے قریب واقع دریائے سندھ سے نیشنل سیونگز سینٹر ریشم گلی سے لوٹی جانے والی آہنی تجوری برآمد کرلی جو کھلی ہوئی تھی جس کے بعد پولیس نے تفتیش کا دائرہ بڑھا کر پیرشیر روڈ پر واقع بھارپور محلے میں ایک مکان میں چھاپہ مار کر 45کروڑ روپے سے زائد مالیت کے سیونگز سر ٹیفکیٹ برآمد کرلئے۔ پولیس نے مختلف بینکوں سے لوٹے جانے والے 10 ائیرکنڈیشنر، 25رائفلیں اور 27بندوقیں بھی برآمد کرلیں۔ جبکہ ضلع قمبر شہدادکوٹ میں لوٹے جانے والے اسلحے میں سے 6 کلاشنکوف،ایک ریپیٹر،87بندوقیں،16رائفلیں اور 24 پستول برآمد کرلئے۔پولیس نے ایک درجن سے زائد افراد کو حراست میں لے لیا۔