گورنر پنجاب سلمان تاثیر کے قتل کی تفتیش کے دوران پولیس کو اب اس مولوی کی تلاش ہے جس نے مبینہ طور پر ممتاز قادری کو اشتعال دلایا تھا اور اس کام کے لیے اکسایا تھا۔

پاکستانی ذرائع ابلاغ کے مطابق ممتاز قادری نے تفتیش کاروں کو بتایا ہے کہ راولپنڈی سے تعلق رکھنے والے ایک مولوی نے یہ قتل کرنے کے لیے اس کی حوصلہ افزائی کی تھی۔

ذرائع کے مطابق ممتاز قاردی نے اکتیس دسمبر کو راولپنڈی کے علاقے صادق آباد میں ایک مذہبی اجتماع میں شرکت کی تھی جہاں اس مولوی نے توہینِ رسالت کے موضوع پر خطاب کیا تھا۔

اس خطاب سے متاثر ہو کر ممتاز قادری نے اس مولوی سے ملاقات کی جس میں توہینِ رسالت کے مرتکب افراد کو قتل کرنے کا معاملہ بھی زیرِ بحث آیا۔ اسی ملاقات میں مولوی نے ممتاز کی اس قتل کے لیے حوصلہ افزائی کی۔

پولیس حکام کے مطابق اس مولوی کے بارے میں معلومات حاصل کر لی گئی ہیں اور اس کا نام مطلوب افراد کی فہرست میں بھی شامل کر دیا گیا ہے۔
اکستانی ذرائع ابلاغ کا یہ بھی کہنا ہے کہ سکیورٹی اداروں نے ایلیٹ فورس سے تعلق رکھنے والے ممتاز قادری کے ایک اور دوست کو بھی گرفتار کیا ہے۔ یہ شخص وزیراعظم کے سکیورٹی سکواڈ کا حصہ تھا اور ممتاز اس سے توہینِ رسالت کے معاملے پر بحث کیا کرتا تھا۔

اس سے قبل گورنر پنجاب قتل کے حقائق جاننے کے لیے پنجاب پولیس کی سپیشل برانچ کے ایڈیشنل آئی جی ناصر خان درانی کی سربراہی میں قائم کی جانے والی تین رکنی کمیٹی نے راولپنڈی پولیس کے چیف سکیورٹی افسر خالد ستی اوراعجاز یوسف سے تفتیش کی تھی۔

اِن پولیس اہلکاروں پر الزام ہے کہ اُنہوں نے ہدایت کے باوجود حکومتی عہدوں پر فائز اہم شخصیات کی سکیورٹی پر تعینات ایلیٹ فورس کے جوانوں کے کوائف کی جانچ پڑتال نہیں کی تھی۔ اِن پولیس افسران کو شہر نہ چھوڑنے کی ہدایت کی گئی ہے جبکہ اُن کے گھر کے باہر پولیس اہلکار بھی تعینات کیے گئے ہیں۔

مذکورہ ٹیم نےگورنر پنجاب کے قتل کے بارے میں وزیرِاعلی پنجاب کو جو عبوری رپورٹ دی تھی اُس میں اِس بات کی نشاندہی کی گئی تھی کہ سلمان تاثیر کا وقوعہ کے روز سکیورٹی کے بغیر نکلنا درست نہیں تھا۔

نامہ نگار شہزاد ملک کے مطابق کمیٹی کے سربراہ ناصر خان درانی سے رابطہ کیا گیا تو اُنہوں نے اس حوالے سے کچھ بتانے سےگُریز کیا۔
راولپنڈی پولیس کی سکیورٹی برانچ کے ایک اہلکار نے اپنا نام ظاہر نہ کرنے کی شرط پر بی بی سی کو بتایا کہ سپیشل برانچ یا کسی اور خفیہ ادارے کی جانب سے ایسا کوئی خط تحریر نہیں کیا گیا تھا جس میں کہا گیا ہو ممتاز قادری کو اہم شخصیات کی سکیورٹی کی ڈیوٹی ادا کرنے والے سکواڈ میں شامل نہ کیا جائے۔

اُنہوں نے کہا کہ اگر ایلیٹ فورس میں شامل کسی بھی اہلکار کے کردار سے متعلق کوئی شک ہو تو اُسے فوری طور پر ایلیٹ فورس سے نکال دیا جاتا ہے اور اُس کے خلاف تحقیقات شروع ہوجاتی ہیں۔

اہلکار کا کہنا ہے کہ گورنر پنجاب کے قتل کے الزام میں گرفتار ہونے والے ممتاز قادری کے خلاف محکمانہ کارروائی کا کوئی ریکارڈ موجود نہیں ہے۔
بی بی سی اردو

__________________

اور اس نے میرے ساغر میں
مئے سرخ انڈیلی ۔۔۔ تو کہا
مت سوچو !