کراچی ایل پی جی پروڈیوسرز کی جانب سے طلب میں اضافے کے دوران پیداوار میں کمی پر حکومت باقاعدہ تحقیقاتی کمیٹی مقرر کرے۔یہ بات ایل پی جی ڈسٹری بیوٹر ز ایسو سی ایشن کے چیئرمین ہادی خان نے جیو نیوز سے گفتگو میں کہی، انہوں نے کہا کہ چند بڑے پروڈیوسرز نے پیداوار میں تین سو ٹن یومیہ کمی کر دی ہے، جس کے باعث سردیو ں کے زیادہ کھپت والے سیزن میں کراچی میں ایل پی جی کی قیمت65 روپے فی کلو اور پنجاب میں 75روپے فی کلوتک پہنچ گئی ہے، انہوں نے مطالبہ کیا کہ حکومت پچھلے ایک ماہ کے دوران پروڈیوسرز کی جانب سے پیداواراور مارکیٹنگ کمپنیوں کی سپلائی کا ریکارڈ دیکھے، تاکہ ذزخیرہ اندوزوں اور منافع خوروں کو پکڑا جا سکے۔ہادی خان نے مزید بتایا کہ موسم سرما کے باعث ایران میں ایل پی جی کی کھپت میں اضافے کے باعث،اس کی اسمگلنگ 50 فیصد کمی کے بعد 40 سے 50 ٹن یومیہ ہو گئی ہے، جس کے باعث بھی سپلائی اور قیمتوں پر اثر پڑا ہے۔مارکیٹ ذرائع کے مطابق جے جے وی ایل کی جانب سے سستی گیس کی سپلائی کے باوجود کچھ ڈسٹری بیوٹرز اور رٹیلرز عوام کو 10 روپے سستی گیس سپلائی نہیں کر رہے۔