19 ستمبر 2010
کراچی (مانیٹرنگ ڈیسک) مسلم لیگی دھڑوں کے ادغام کیلئے پیر پگاڑا کی سربراہی میں سابق وزرائے اعظم چوہدری شجاعت حسین اور میر ظفر اللہ خان جمالی پر مشتمل تین رکنی کمیٹی مسلم لیگ ن کے قائد میاں نواز شریف کو دعوت دیں گے۔کمیٹی نے فیصلہ کیا ہے کہ 10اکتوبر سے پہلے یہ تینوں رہنماءمسلم لیگ ن کے سربراہ میاں نواز شریف سے ملاقات کرکے اُنہیں مسلم لیگ کے ادغام کی دعوت دیں گے۔کمیٹی نے یہ بھی فیصلہ کیا ہے کہ اگر میاں نواز شریف متحدہ مسلم لیگ کا حصہ بنتے ہیں تو انہیں اُس کا چیئرمین بنا دیا جائے گا۔ آج نیوز کے مطابق یہ کمیٹی میاں نواز شریف سے لاہور یا اسلام آباد میں ملاقات کر سکتی ہے اور اگر میاں نواز شریف کمیٹی سے بیرون ملک ملنا چاہیں تواس کے لیے بھی پیر پگاڑا تیار ہیں۔دوسری جانب سندھ اور بلوچستان سے پیپلز پارٹی کے کچھ ناراض اراکین نے پیر پگاڑاسے ملاقات کی اور اُنہیں اس بات کا یقین دلایا کہ وہ بھی متحدہ مسلم لیگ کا حصہ بننے کیلئے تیار ہیں۔اس کے علاوہ مسلم لیگ ن کے بعض رہنماﺅں کی جانب سے پیر پگارا کی کاوش کو خوش آئند قرار دیا گیا ہے ۔

__________________
جاویداسد