ڈسپلن توڑنے پر آفریدی پر 45لاکھ جرمانہ،تمام این او سیز بحال

لاہور(جنگ نیوز) پاکستان کرکٹ بورڈ کی انضباطی کمیٹی نے سابق کپتان شاہد آفریدی کو ضابطہ اخلاق کی خلاف ورزی پر 45 لاکھ روپے جرمانہ عائد کرتے ہوئے کاؤنٹی کرکٹ اور سری لنکا لیگ کھیلنے کیلئے آفریدی کے تمام این او سیز بحال کردیے جس کے بعد آل راؤنڈر انگلش کاؤنٹی اور آئندہ ماہ سری لنکا کرکٹ لیگ کھیلنے کے اہل ہوں گے۔کمیٹی کے سامنے شاہد آفریدی نے پیش ہو کر اپنا بیان ریکارڈ کروایا اور ضابطہ اخلاق کی خلاف ورزی کا اعتراف کیا تاہم معافی نہیں مانگی۔آفریدی نے بورڈ کی جانب سے دی گئی سزا کو قبول کرتے ہوئے اس کے خلاف اپیل نہ کرنے کا فیصلہ کیا۔ بعد میں میڈیا سے گفتگو کرتے ہوئے پی سی بی کے قانونی مشیر تفضل رضوی نے بتایا کہ شاہد آفریدی نے کمیٹی کے سامنے پیش ہو کر اپنی پوزیشن واضح کی ہے اور ضابطہ اضلاق کی خلاف ورزی کو تسلیم کر لیا ہے۔ا نہوں نے بتایا کہ کمیٹی نے طویل سماعت اور غور خوض کے بعد شاہد آفریدی پر 45 لاکھ روپے جرمانہ عائد کیا ہے، چونکہ آفریدی نے اپنی غلطیوں کا اعتراف کرلیا لہٰذا کمیٹی نے ان کے ساتھ نرمی کرتے ہوئے کم جرمانہ کیا ہے، ورنہ جن شقوں کی انہوں نے خلاف ورزی کی ہے اس پر آفریدی کو 70سے 80لاکھ روپے جرمانہ ہوسکتا تھا۔اس موقع پر سابق کپتان شاہد آفریدی نے کہاکہ وہ کمیٹی کے فیصلے سے مطمئن ہیں۔انہوں نے کہا کہ کمیٹی نے میراموقف غور سے سنا اور میں نے اپنے تحفظات پیش کئے۔ میرے معاملات کو میڈیا نے اٹھایا جس پر شکر گزار ہوں۔ انہوں نے کہاکہ میرا ابھی بین الاقوامی کرکٹ کھیلنے کا کوئی ارادہ نہیں، مستقبل میں اس بارے میں سوچوں گا فی الحال کاؤنٹی کرکٹ کھیلنے لندن جاؤں گا۔