جرمن کے ماہرین نفسیات نے سیلز مینوں، فضائی میزبانوں اور دیگر پیشوں سے تعلق رکھنے والے افراد کو مشورہ دیا ہے کہ پیشہ وارانہ مسکراہٹ کا حد سے زیادہ استعمال نہ کریں۔ جرمنی کے ذرائع ابلاغ کے مطابق ماہرین نفسیات نے کہا ہے کہ اپنے چہرے پر زبردستی مسکراہٹ سجانے والے افراد ڈیپریشن اور دل کے مسائل سے دو چار ہو سکتے ہیں۔ ماہرین نے اس ضمن میں سیلز مینوں، فضائی میزبانوں اور کائونٹرز پر کام کرنیوالے افراد کو محتاط رہنے کا مشورہ دیا ہے۔ ماہرین کے مطابق مسکراہٹ ایک اچھی عادت ہے تاہم پیشہ وارانہ مسکراہٹ کے حوالہ سے محتاط رہنے کی ضرورت ہے کیونکہ ایسی مسکراہٹ ذہنی افسردگی اور دل کی بیماریوں کا باعث بھی بن سکتی ہے۔ ماہرین کے مطابق زبردستی کی مسکراہٹ کے باعث منہ کے عضلات کو بھی نقصان پہنچ سکتا ہے۔