پیشہ ورگروہوں سے بچنے والے لڑکے لڑکیاں دوبارہ سمگل کرلئے جاتے ہیں



لندن (سٹاف رپورٹر) سیکڑوں لڑکوں اور لڑکیوں کو جنہیں منظم پیشہ گروہوں سے بچا کر واپس کر دیا جاتا ہے دوبارہ اغوا کر کے سمگل کر لئے جاتے ہیں اور جرائم پیشہ گروہ انہیں دوبارہ عصمت فروشی پر مجبور کر دیتے ہیں۔ اقوام متحدہ کے ایک سروے کے مطابق 330 لڑکوں اور لڑکیوں کو یوکے میں جرائم پیشہ گروہوں کے قبضہ سے نکالا گیا لیکن ان میں سے نصف لوکل اتھارٹی کی کیئر سے غائب ہو گئے۔ یہ خدشہ ہے کہ انہیں دوبارہ پکڑ لیا گیا ہے۔ برطانیہ میں پچیس ہزار سے زیادہ غیر ملکی عورتیں اور لڑکیاں جدید غلامی میں پھنسی ہوئی ہیں انہیں بہتر زندگی کے سنہری خواب دکھا کر سمگل کیا گیا تھا لیکن دھمکا کر انہیں قحبہ خانوں میں بٹھا دیا گیا یا پھر جرائم پیشہ افراد کو فروخت کر دیا گیا۔ اکثر کا تعلق غریب ملکوں سے ہے ان دنوں اوسط عصمت فروش عورت اپنے دلال کو ایک لاکھ پونڈ تک سالانہ کما کر دے سکتی ہے۔ یہ سلسلہ اب شہروں تک ہی محدود نہیں بلکہ دیہی علاقوں تک پھیل گیا ہے۔