اسلام آباد (نمائندہ جنگ) نگران وفاقی وزیر اطلاعات و نشریات نثار اے میمن نے کہا ہے کہ پمرا آرڈیننس کی پابندی کرنے پر باقی 2 چینلز کی نشریات کل سے شروع ہو سکتی ہیں۔انہوں نے کہا کہ ایک دو ٹی وی چینل جو پمرا آرڈیننس پر اپنے باقی 29 ٹی وی چینلوں کی طرح پابندی کی یقین دہانی کرا دیں ان کی نشریات کل سے شروع ہو سکتی ہیں۔ ہمارا کہنا ہے کہ سبھی کو چاہے چھوٹا ہو یا بڑا ملکی قوانین پر عملدرآمد کرنا ہو گا۔ہمارا ایمان ہے کہ میڈیا کی آزادی بے حد ضروری ہے۔وہ یہاں اپنے چیمبر میں نمائندہ جنگ کو خصوصی انٹرویو دے رہے تھے۔ انہوں نے بتایا کہ 29 ٹی وی چینلوں کی نشریات بحال ہو چکی ہیں صرف ایک دو رہ گئے ہیں ان کی نشریات بھی دوبارہ شروع ہو جائیں گی۔ ملکی قانون کا احترام ہر ٹی وی چینل کی ذمہ داری ہے۔ میڈیا کی آزادی کے تمام اسٹیک ہولڈروں کیلئے نگران وزیراعظم، نگران وزیر اطلاعات کے دروازے کھلے ہیں نگران کابینہ کے پہلے اجلاس میں ہی بطور وزیر اطلاعات و نشریات مجھے یہ مشن سونپا گیا ہے کہ ملک میں ایسا ماحول پیدا کیا جائے جس میں میڈیا عزت و احترام اور ذمہ داری کے ساتھ حالات حاضرہ سے ناظرین کو آگاہی دینے کا فریضہ سرانجام دے سکے۔جنرل پرویز تربیت کے اعتبار سے فوجی ہیں تاہم دل و دماغ کے لحاظ سے بردبار، متحمل مزاج اور جمہوری انسان ہیں ان میں پاکستانیت کا جذبہ کوٹ کوٹ کر بھرا ہوا ہے۔ وہ ایسے انسان ہیں جنہوں نے اس امر کو یقینی بنا رکھا ہے کہ پاکستان کے جوہری اثاثے غلط ہاتھوں میں نہ چلے جائیں۔ جوہری ہتھیاروں نے ملک سے دفاع کو ناقابل تسخیر بنا دیا ہے کسی دوسرے ملک کی پاکستان کے جوہری ہتھیاروں تک نہ رسائی ہے نہ ہی ان کے بارے میں معلومات ہیں،نثار اے میمن نے کہا کہ جنرل پرویز ظاہر و باطن سے حقیقی پاکستانی ہیں، محب وطن ہیں۔انہوں نے کہا کہ وزیر قانون اور وزیر داخلہ پر مشتمل ٹیم 3 نومبر کے بعد حراست میں لیے جانے والے صحافیوں، سیاسی کارکنوں، وکلا کی رہائی کے کیسوں کا فیصلہ کرنے کے لیے بنا دی گئی ہے۔

__________________