اسلام آباد(تجزیہ نگارخصوصی/ صالح ظافر)پاکستان پیپلزپارٹی اس بات کاحق محفوظ رکھتی ہے کہ اپنی مقتول چیئرپرسن بینظیربھٹو کے قتل کی اقوام متحدہ کی حقوق انسانی کونسل سے تحقیقات کرانے کے بعد کیس کوبین الاقوامی عدالت انصاف لے جائے۔عالمی ادارے نے 2006ء میں کونسل تشکیل دی تھی جس کوبینظیربھٹوکے قتل جیسے واقعات کی تحقیقات کرنے کااختیارحاصل ہے کیونکہ یہ بدترین قسم کی حقوق انسانی کی خلاف ورزی ہے لہذاریاست یاانفرادی سطح پر کیس کوکونسل میں لے جایاجاسکتاہے۔اس بات کادعویٰ پیپلزپارٹی کے سینیٹر اور ممتاز قا نو ن دان بیرسٹرسردارلطیف کھوسہ نے منگل کی شام دی نیوزسے خصوصی گفتگوکرتے ہوئے کیا،انہوں نے حکومت کے اس دعوے سے اختلاف کیاکہ یہ کیس اقوام متحدہ کے حوالے نہیں کیاجاسکتا۔انہوں نے کہاکہ اقوام متحدہ نے جو کونسل تشکیل دی ہے اس نے سابق کمیشن کی جگہ لے لی ہے اورکونسل کے دائرہٴ کارمیں اضافہ ہوگیاہے۔پیپلزپارٹی کے شریک چیئرپرسن آصف علی زرداری نے درست طورپرفیصلہ کیاہے کہ وہ قتل کی تحقیقات شروع کرانے کیلئے اقوام متحدہ کادروازہ کھٹکھٹائیں گے۔دریں اثناء سفارتی ذرائع نے انکشاف کیاہے کہ اقوام متحدہ کی حقوق انسانی کونسل نے اسکے حقوق انسانی کمیشن کی جگہ لے لی ہے ،یہ کونسل 15مارچ 2006ء کو اقوام متحدہ کی جنرل اسمبلی کی ایک قرارداد کے ذریعے وجودمیں آئی اوردلچسپ بات یہ ہے کہ امریکااوراسرائیل سمیت چندملکوں نے اسکی مخالفت بھی کی تھی۔کمیشن کے برعکس کونسل کارتبہ بڑھاکراسے جنرل اسمبلی کی ذیلی تنظیم قراردیاگیاہے۔ستمبر2007ء میں کونسل نے ایک نئی مشاورتی کمیٹی کے قیام کافیصلہ کیا۔یہ کمیٹی مخصوص ممالک میں حقوق انسانی کی خلاف ورزیوں کی نگرانی یاعالمی حقوق انسانی کے مسائل کاجائزہ لے گی۔