پیپلز پارٹی اور ن لیگ ججوں کی بحالی کیلئے کابینہ کمیٹی بنانے پر متفق
اسلام آباد (محمد احمد نورانی) معزول ججوں کی بحالی کیلئے پارلیمانی کمیٹی کے قیام پر ن لیگ کے شدید تحفظات کے بعد اب پیپلز پارٹی اور ن لیگ اعلان مری کے مطابق مقررہ ٹائم فریم میں ججوں کی بحالی سے متعلق معاملات کو حتمی شکل دینے کیلئے کابینہ کمیٹی کے قیام پر متفق ہو گئی ہیں۔ دونوں جماعتوں کے قابل اعتماد ذرائع نے ہفتہ کے روز ”دی نیوز“ کو اس بات کی تصدیق کی کہ پارلیمانی کمیٹی پر ن لیگ کے تحفظات کے بعد پیپلز پارٹی نے ن لیگ سے کابینہ کمیٹی کے قیام پر بات کی تو ن لیگ نے اس پر رضا مندی ظاہر کی۔ ذرائع نے بتایا کہ کمیٹی کے قیام اور اس کے ارکان کے ناموں کا باضابطہ اعلان 15 اپریل کو اسلام آباد میں اتحادی جماعتوں کے سربراہوں میں ملاقات کے بعد کیا جائے گا۔ مجوزہ کابینہ کمیٹی کے سربراہ وفاقی وزیر قانون فاروق ایچ نائیک ہوں گے اور یہ کمیٹی 3 نومبر سے پہلے کی عدلیہ کی بحالی کے بعد موجودہ ججوں کے سٹیٹس اور پی سی او ججوں کی طرف سے دیئے گئے فیصلوں کے سٹیٹس جیسے معاملات حل کرے گی۔ پیپلز پارٹی کے ذرائع نے دی نیوز کو بتایا کہ تمام اتحادی جماعتیں اعلان مری کے مطابق مقررہ ٹائم فریم میں 3 نومبر سے پہلے کی عدلیہ کی مکمل بحالی کے عزم پر قائم ہیں تاہم ججوں کی بحالی سے متعلق کچھ معاملات ہیں جن میں موجودہ ججوں کا سٹیٹس ان کے سنائے گئے فیصلوں کی قسمت ایسے ایشوز ہیں جن پر مناسب تبادلہ خیال اور انہیں حل کرنے کی ضرورت ہے جس کیلئے کابینہ کمیٹی تشکیل دی جا رہی ہے۔ ذرائع نے ایک سال سے چلے آ رہے عدالتی بحران کیلئے 15 اپریل کو ہونے والی اتحادی جماعتوں کے رہنماؤں کی ملاقات کو اہم قرار دیا۔ یہ اجلاس پہلے 14 اپریل کو ہونا تھا پھر اس کی 16تاریخ مقرر ہوئی بعدازاں 15اپریل اجلاس کی حتمی تاریخ مقرر ہوئی۔ ن لیگ کے ایک رہنما کے مطابق وقت پھر تبدیل ہو سکتا ہے لیکن پیپلز پارٹی کے ترجمان فرحت اللہ بابر نے کہا کہ اجلاس منگل کو ہی ہو گا۔ پیپلز پارٹی اور ن لیگ کے ذرائع نے ”دی نیوز“ کو اجلاس کی تفصیلات بتاتے ہوئے کہا کہ پیپلز پارٹی کے شریک چیئرمین آصف علی زرداری نے اتحادی جماعتوں کے رہنماؤں کو زرداری ہاؤس میں ظہرانے کیلئے دعوت دی ہے۔ پہلے دور میں آصف زرداری اور نواز شریف پہلے میٹنگ کریں گے اس کے بعد دوسرے دور میں تمام اتحادی جماعتوں کے رہنما اکٹھے مل بیٹھیں گے۔ دریں اثناء ایک وکلاء رہنما نے ”دی نیوز“ کو بتایا کہ وکلاء برادری کو دونوں جماعتوں کی قیادت پر مکمل اعتماد ہے اور انہیں یقین ہے کہ یہ جماعتیں 3 نومبر کو برطرف کئے گئے سپریم کورٹ اور ہائیکورٹس کے ججوں کو نہ صرف بحال کریں گی بلکہ عدلیہ کو مکمل طور پر آزاد بھی بنائیں گی۔ اجلاس کے بعد قومی اسمبلی میں قرارداد پیش کرنے کے ٹائم فریم کا بھی اعلان کیا جائے گا جس کے بعد ججوں کی اپنے دفاتر کو واپسی کے سلسلے میں معاونت کی جائے گی دیگر اہم معاملات پر اعلیٰ قیادت تبادلہ خیال کرے گی جبکہ دوسرے چھوٹے معاملات کو کابینہ کمیٹی حتمی شکل دے گی۔

__________________