15 دسمبر 2010
اسلام آباد (مانیٹرنگ ڈیسک)پاکستان پیپلزپارٹی کی جانب سے جمعیت علماءاسلام ( ف) کو واپس حکومت میں شمولیت کی کوشش ناکام ہو گئی ہے۔ پیپلز پارٹی کے رہنماءوفاقی وزیر خورشید شاہ نے جمعیت علمائے اسلام کے سربراہ مولا نا فضل الرحمن سے اسلام آباد میں اُن کی رہائش گاہ پرملاقات کی۔وفاقی وزیر خورشید شاہ نے جے یو آئی کے سربراہ مولانا فضل الرحمن کو دوبارہ حکومت میں شامل ہونے کیلئے آمادہ کرنے کی کوشش کی اور جے یو آئی کی شکایات اور تحفظات دور کرنے کی یقین دہانی کرائی تاہم مولانا فضل الرحمن کا کہنا تھا کہ اب بہت دیر ہو چکی ہے۔ دونوں جماعتوں کے درمیان اختلافات کا اندازہ اس بات سے لگایا جا سکتا ہے کہ ملاقات کے بعد مولانا فضل الرحمان ، خورشید شاہ کو دروازے تک الوداع کہنے بھی نہیں آئے۔ملاقات کے بعد صحافیوں سے گفتگو کرتے ہوئے خورشید شاہ نے کہا کہ اختلاف رائے ہی جمہوریت کا حسن ہوتا ہے اور اُنہیں اُمید ہے کہ جلد ہی جے یو آئی ( ف )کو منا لیں گے۔اُنہوں نے بتایا کہ مولانا فضل الرحمن کو جو تجاویز دی گئی ہیں اُن پر وہ پارٹی مشاورت کے بعد جواب دیں گے۔ اُنہوں نے تسلیم کیا کہ سابق وفاقی وزیراعظم سواتی کی برطرفی سے قبل وزیر اعظم نے جے یو آئی کی قیادت کو آگاہ نہیں کیا لیکن اُنہیں متعدد بار وزیر اعظم نے خبردار کیا تھا کہ میڈیا پر بیان بازی نہ کی جائے لیکن وہ نہیں مانے جبکہ اعظم سواتی کو کرپشن کے الزامات کی وجہ سے برطرف کیا گیا۔ مسلم لیگ سے رابطوں سے متعلق سوال پر وفاقی وزیر نے کہا کہ پیپلزپارٹی نے مفاہمت کی پالیسی اپنائی ہے اور تمام جماعتوں سے بات چیت روزانہ کا معمول ہے۔دوسری جانب مولانا فضل الرحمن نے الگ میڈیا سے گفتگو کرتے ہوئے کہا کہ اُن کے مطالبات اور ترجیحات پر حکمران جماعت کی جانب سے کبھی توجہ نہیں دی گئی تاہم اِس کے باوجود مفاہمت کی پالیسی پراُنہوں نے عملدرآمد کیا جس پر اُنہیں تنقید بھی برداشت کرنی پڑی لیکن حکومت نے خود مفاہمتی پالیسی پر کلہاڑا مارا۔ اُنہوں نے کہا کہ اگراعظم سواتی نے ڈسپلن کی خلاف ورزی کی ہے تو وزیر اعظم نے بھی ایسا ہی کیا ہے کیونکہ اصولی طور پر وزیر اعظم کو اُن کی جماعت کے وزیر کی برطرفی سے قبل انہیں آگاہ کرنا چاہیے تھا۔ اُنہوں نے واضح کیا کہ وہ جمہوری نظام کو رواں دواں دیکھنا چاہتے ہیں۔

__________________
جاویداسد