پیپلز پارٹی وفاق کی علامت ہے، ذوالفقار مرزا



ٹنڈو باگو (نامہ نگار) پی ایس 57 ٹنڈو باگو سے پیپلز پارٹی کے امیدوار ڈاکٹر ذوالفقار مرزا نے کہا ہے کہ وطن عزیز میں بعض مخالف پارٹیاں اور سازشی عناصر پیپلز پارٹی کو کمزور کرنا چاہتے ہیں پہلے ذوالفقار علی بھٹو کو شہید کر کے یہ مقصد حاصل کرنے کی کوشش کی گئی۔ محترمہ بے نظیر بھٹو شہید نے اپنی قائدانہ صلاحیتوں اور جدوجہد سے پارٹی کو نہ صرف زندہ رکھا بلکہ اسے طاقتور اور مقبول بنا دیا اب انہی سازشی عناصر نے محترمہ بے نظیر بھٹو کو نشانہ بنا کر ایک بار پھر پیپلز پارٹی کے استحکام کو متاثر کرنے کی کوشش کی ہے۔ وہ ٹنڈو باگو میں پیپلز پارٹی کے کارکنوں سے باتیں کر رہے تھے انہوں نے کہا کہ پیپلز پارٹی وفاق کی علامت ہے اگر پیپلز پارٹی کو کمزور کرنے کی کوشش کی گئی تو انتہا پسند قوتیں اور دہشت گرد مضبوط ہو جائیں گے۔ انہوں نے کہا کہ محترمہ بے نظیر بھٹو کی شہادت قومی سانحہ ہے۔ اس سانحے کا سب سے زیادہ دکھ اور صدمہ پاکستان کے غریب عوام کو ہو رہا ہے۔ محترمہ کی شہادت کے بعد ایسالگتا ہے کہ جیسے غریبوں کے سر سے سایہ اٹھ گیا ہے۔ انہوں نے کہا کہ آج وہ ہم میں نہیں ہیں لیکن ان کا مشن ہمارے پاس ضرور ہے یہی مشن اس ملک کے غریبوں کو 18فروری کے دن نجات دلائے گا، 18فروری کو عوام کی حاکمیت قائم ہوگی۔