پیپلز پارٹی کیخلاف سازش خطرناک صورتحال پیدا کرسکتی ہے، تحریک استقلال



کراچی (اسٹاف رپورٹر) تحریک استقلال کے مرکزی صدر رحمت خان وردگ نے کہا ہے کہ محترمہ بینظیر بھٹو کا قتل صرف پیپلز پارٹی کا ہی نہیں بلکہ ملک کا نقصان ہے جس کے باعث پورے ملک کے عوام اس نازک صورتحال میں اپنی ذات کے بجائے اپنے ملک کیلئے سوچیں، تحریک استقلال کے مرکز سے جاری کردہ اپنے بیان میں رحمت خان وردگ نے کہا کہ بینظیر بھٹو کا قتل ملک کیخلاف گہری سازش ہے اس سازش کو بے نقاب کیا جائے، انہوں نے صدر پرویز مشرف کی جانب سے سانحہ کی تحقیقات کیلئے اسکاٹ لینڈ یارڈ پولیس سے کرنے کے اعلان کا خیرمقدم کرتے ہوئے کہا کہ پیپلز پارٹی سمیت ملک بھر کی جمہوری قوتیں تحقیقات کے سلسلے میں اسکاٹ لینڈ یارڈ پولیس سے کرنے کے اعلان کا خیرمقدم کرتے ہوئے کہا کہ پیپلز پارٹی سمیت ملک بھر کی جمہوری قوتیں تحقیقات کے سلسلے میں اسکاٹ لینڈ یارڈ پولیس کی مدد اور حمایت کریں، انہوں نے کہا کہ پیپلز پارٹی اس وقت نازک صورتحال سے گزر رہی ہے اور ان کے رہنما اور عوام حالت سوگ میں ہیں ایسے حالات میں پارٹی کیخلاف کوئی بھی سازش ملک کیخلاف خطرناک صورتحال پیدا کرسکتی ہے۔ اپنے بیان میں رحمت خان وردگ نے کہا کہ بینظیر بھٹو قتل کیس کی نہ صرف غیر جانبدارانہ تحقیقات کی جائے بلکہ اس تحقیقات کو منظر عام پر بھی لایا جائے، انہوں نے صدر پرویز مشرف سے مطالبہ کیا کہ آئندہ انتخابات کو صاف و شفاف بنانے کیلئے تمام اقدامات کیے جائیں۔