یورپ نے اپنے مجوزہ سیٹلائٹ نیویگیشن نظام ’گلیلیو‘ کے اطلاق کی راہ میں ایک اہم قدم اٹھاتے ہوئے اپنی دوسری سیٹلائٹ خلا میں روانہ کر دی ہے جو پورے نظام کح جانچ کرے گی۔
اس سیٹلائٹ کو قزاقستان کے ایک سویوز راکٹ نے سنیچر کی شب خلائی مدار میں پہنچایا۔

گلیلیو کے تحت تیس سیٹلائٹ خلا میں بھیجی جائیں گی اور یہ دنیا کا سب بہترین سیٹلائٹ نیویگیشن نظام ہوگا۔ سیٹلائٹ نیوگیشن کے ذریعہ یہ پتہ لگایا جاسکتا ہے کہ آپ دنیا میں کس جگہ ہیں اور اگر آپ ایک جگہ سے دوسری جگہ جانا چاہتے ہیں تو یہ سیٹلائٹس آپکو راستہ بھی دکھا سکتی ہیں۔ تاہم اب اس ٹیکنالوجی کو طیارے اتارنے جیسے انتہائی پیچیدہ کاموں کے لیے بھی استعمال کیا جاسکے گا۔

سیٹلائٹ نیویگیشن کا نظام تو پہلے سے موجود ہے لیکن فی الحال اس کے لیے امریکی سیٹلائٹس پر انحصار کرنا پڑتا ہے۔ اسے گلوبل پوزیشنگ سسٹم یا جی پی ایس کہتے ہیں۔ یورپی نظام اس سے کہیں زیادہ بہتر ہوگا۔ امریکی نظام میں پانچ چھ میٹر کی غلطی کی گنجائش ہے جو یورپی نظام میں ایک میٹر سے زیادہ نہیں ہوگی۔

جو سیٹلائٹ اب خلا میں بھیجی گئی ہے وہ یورپی نظام میں استعمال ہونے والی ٹیکنالوجی کو ٹیسٹ کرے گی۔ اس کا ایک بنیادی کام وقت کے تعین کے نظام کو بھی چیک کرنا ہوگا جس کے بغیر نیویگیشن کا پورا سسٹم بکھر سکتا ہے۔ اس سے پہلے سن دو ہزار پانچ میں بھی اسی طرز کی ایک سیٹلائٹ خلا میں بھیجی گئی تھی۔ ان سیٹلائٹس کو جیوو اے اور جیوو بی کے نام دیے گئے ہیں۔

پہلا مشن بین الاقوامی معیارات پر پورا اترا تھا۔ جیوو بی کو خلا میں بھیجنے میں کئی مربتہ تاخیر ہوئی کیونکہ کچھ کل پرزے ٹھیک سے کام نہیں کر رہے تھے۔
گلیلیو پروگرام میں بھی کافی تاخیر ہوئی ہے اور ایک مرحلے پر تو اسے ختم کرنے کی نوبت آگئی تھی۔

اس منصوبے پر یورپ ڈھائی ارب ڈالر خرچ کرچکا ہے۔ اس کے علاوہ سوا پانچ ارب ڈالر حال ہی میں منظور کیے گئے ہیں لیکن منصوبے میں شامل حکومتوں نے یہ واضح کر دیا ہے کہ مزید رقم فراہم نہیں کی جائے گی۔

اگر جیوو بی کے تمام تجربے کامیاب ثابت ہوتے ہیں تو گلیلیو کے پہلے چار مصنوعی سیارے سن دو ہزار دس تک خلا میں پہنچا دیے جائیں گے اور پورا نظام سنہ دو ہزار تیرہ تک کام کرنے لگے گا۔

__________________