پی پی اور ن لیگ کے اعلان کا غیرمشروط خیرمقدم کرتے ہیں، الطاف حسین
کراچی (پ ر)متحدہ قومی موومنٹ کے قائد الطاف حسین نے ملک میں جمہوریت کے استحکام ، مثبت روایات کے فروغ ، پاکستان اور اس کے عوام کی بھلائی ، امن کے استحکام، معاشی طو رپر ملک کومضبو ط کرنے اور ملک کی بقاء وسلامتی کی خاطر پاکستان پیپلزپارٹی اور مسلم لیگ (نوا ز گروپ ) کی مخلوط حکومت کے قیام کے فیصلے کا کھلے دل کے ساتھ غیرمشروط خیرمقدم کیا ہے ۔ انہوں نے یہ بات جمعرات کو کراچی میں بزنس کمیونٹی اور شہر کے معززین کے ایک نمائندہ اجلاس سے خطاب کرتے ہوئے کہی جس میں بزنس کمیونٹی کے نمائندہ افراد، ملک کے معروف صنعتکاروں، تاجروں ،کراچی چیمبر آف کامرس کے نمائندوں، سائٹ ایسوسی ایشن، کورنگی ایسوسی ایشن، مختلف صنعتی وتجارتی تنظیموں کے عہدیداروں ، میمن کمیونٹی ، اسماعیلی کمیونٹی ، ڈیفنس ، کلفٹن ریزیڈنٹس کمیٹی، گلشن اقبال ریزیڈنٹس کمیٹی، سوسائٹی ریزیڈنٹس کمیٹی ، نارتھ ناظم آباد ریزیڈنٹس کمیٹی ، متحدہ کلچرل فورم ، ریسرچ اینڈ ایڈوائزری کونسل ، مہاجر رابطہ کونسل کے اراکین اور مختلف شعبہ ہائے زندگی سے تعلق رکھنے والی شہر اور صوبے کی معروف شخصیات کے علاوہ متحدہ قومی موومنٹ کی رابطہ کمیٹی کے اراکین ، نومنتخب حق پرست ارکان قومی وصوبائی اسمبلی ، حق پرست سینیٹرز اور متحدہ قومی موومنٹ کے مختلف شعبہ جات اور ونگز کے ذمہ داران بھی موجود تھے ۔ الطاف حسین نے اپنے خطاب میں کہاکہ متحدہ قومی موومنٹ نہ صرف پاکستان پیپلزپارٹی اور مسلم لیگ نواز گروپ کی مخلوط حکومت کے قیام کے فیصلہ کا خیرمقدم کرتی ہے بلکہ ملک وقوم کی بہتری ، جمہوریت کے فروغ ، معیشت کو مضبوط کرنے ، مہنگائی ،بے روزگاری اور غربت کے خاتمے ، بجلی کی لوڈشیڈنگ، پانی اورگیس کی قلت کے خاتمہ ، غریب عوام کی فلاح وبہبود اور ملک کو مضبوط کرنے کیلئے متحدہ قومی موومنٹ پاکستان پیپلزپارٹی اور مسلم لیگ نواز گروپ کی مخلوط حکومت کے ہر مثبت اقدام کی غیر مشروط حمایت کرے گی ۔ الطاف حسین نے الیکشن کے موقع پر ایم کیوایم کے ساتھ بھرپور تعاون کرنے اوراسے کامیاب بنانے پرکراچی کے تاجروں، صنعتکاروں اورمیمن برادری سمیت تمام برادریوں کاشکریہ ادا کیااوران کوزبردست خراج تحسین پیش کیا۔ اس موقع پر تمام صنعتکاروں ،تاجروں اورتمام برادریوں کی نمائندہ شخصیات نے ایم کیوایم کے نمائندوں کی بھاری اکثریت سے کامیابی پر الطاف حسین کومبارکبادپیش کی۔

__________________