دنیا کی سب سے بڑی موبائل فون کمپنی ”چائنا موبائل“ نے پاکستان میں مزید 800 ملین ڈالر کی سرمایہ کاری کا اعلان کیا ہے۔ چائنا موبائل کمپنی کے صدر وانگ جین زیو نے یہاں پاکستانی سیکرٹری خارجہ سلمان بشیر سے ملاقات میں کمپنی کی طرف سے پاکستان میں مزید سرمایہ کاری کا اعلان کیا۔ چائنا موبائل اس سے قبل پاکستان میں 800 ملین ڈالر کی سرمایہ کاری کر چکی ہے۔ چائنا موبائل کے صدر نے سیکرٹری خارجہ کو بتایا کہ پاکستان میں ٹیلی کمیونیکیشن کے شعبہ میں عالمی سطح کی حامل کمپنی سونی اریکسین کے علاوہ دیگر کمپنیاں بھی سرمایہ کاری میں دلچسپی رکھتی ہیں۔ انہوں نے کہا کہ پاکستان میں غیر ملکی سرمایہ کاروں کیلئے بہت زیادہ اور بہتر مواقع موجود ہیں۔ ان مواقعوں سے غیر ملکی ملکی اور مقامی سرمایہ کار برابری کی بنیاد پر استفادہ کر سکتے ہیں۔ انہوں نے سیکرٹری خارجہ کو بتایا کہ میری حال ہی میں پاکستانی قیادت سے سودمند ملاقاتیں ہوئیں اور ان ملاقاتوں کے دوران خاص طور پر چینی سرمایہ کاروں کو پیش کی جانے والی مراعات قابل تعریف ہیں۔ انہوں نے بتایا کہ چائنا موبائل نے پاکستان کی سماجی اقتصادی ترقی اور پاکستانی عوام کا معیار زندگی بڑھانے کیلئے مختلف منصوبے بنائے ہیں۔ اس ضمن میں ایک منصوبہ کے تحت پاکستان کے ذہین طالب علموں کو مفت درسی کتب مہیا کی جائیں گی۔ سیکرٹری خارجہ نے چائنا موبائل کے صدر کا شکریہ ادا کرتے ہوئے انہیں یقین دہانی کرائی کہ پاکستان میں انہیں ہر طرح کی ممکنہ سہولیات فراہم کی جائیں گی۔