چناب کے پانی پر پاک بھارت کشیدگی شدت اختیار کرگئی‘ پاکستان کا ورلڈ بینک سے رجوع کرنے کا فیصلہ
سندھ طاس معاہدے کے تحت چناب کے پانی پر ہمارا حق ہے کسی صورت دستبردار نہیں ہونگے‘ پاکستان
پاکستان جانتا ہے ستمبر میں پانی کا بہائو کم ہوجاتا ہے‘ یہ معمول کی بات ہے‘ بھارت کا موقف
اسلام آباد + نئی دہلی (پاک ڈاٹ نیٹ) دریائے چناب کے پانی کے معاملہ پر پاک بھارت کشیدگی شدت اختیار کرگئی ہے اور پاکستان نے اس سلسلے میں ورلڈ بینک سے رجوع کرنے کا حتمی فیصلہ کرلیا ہے۔ وزارت پانی و بجلی کے ایک اعلیٰ عہدیدار نے بتایا چناب کا پانی پاکستانی زراعت میں نہایت اہمیت کا حامل ہے اس سلسلے میں نرم موقف نہیں اپنائیں گے۔ انہوں نے بتایا معاہدہ سندھ طاس کے تحت چناب کے پانی پر پاکستان کا حق ہے۔ ہم کسی صورت اپنے حق سے دستبردار نہیں ہونگے۔ اعلیٰ اہلکار کا کہنا تھا بھارت کو پاکستان کے ساتھ کئے گئے معاہدے کا احساس و پاس کرتے ہوئے ہمارے حصہ کے پانی پر کٹ نہیں لگانا چاہئے۔ انہوں نے کہا یہ انتہائی حساس معاملہ ہے اس پر بھرپور سٹینڈ لیا جائے گا۔ادھر بھارتی وزارت پانی و بجلی کے ترجمان نے کہا ہے کہ پاکستان اچھی طرح جانتا ہے کہ ستمبر کے مہینے میں پانی کے بہائو میں کمی آتی ہے یہ پہی بار نہیں ہوا بلکہ گزشتہ کئی برسوں سے ایسا ہورہا ہے وقت کے ساتھ صورتحال معمول پر آجائے گی۔ انہوں نے کہا بھارت نے سندھ طاس معاہدے کی کوئی خلاف ورزی نہیں کی ہے۔ ادھر تربیلا اور منگلا ڈیم میں پانی کی سطح مزید گر گئی‘ تربیلا ڈیم میں پانی کی سطح مزید دوفٹ کم ہو کر 1516 فٹ تک پہنچ گئی ہے۔ جمعرات کے روز ارسا کی طرف سے جاری کی گئی رپورٹ کے مطابق تربیلا ڈیم میں پانی کی سطح مزید دو فٹ کم ہو کر 1516 فٹ تک پہنچ گئی ہے اور گزشتہ تین ہفتوں کے دوران ڈیم میں پانی کی سطح میں 34 فٹ کی کمی ہوئی ہے۔ جمعرات کے روز ڈیم میں پانی کی آمد 62200 کیوسک فٹ رہی جبکہ اخراج ایک لاکھ 20ہزار کیوسک فٹ رہا۔ منگلا ڈیم میں پانی کی سطح بھی ایک فٹ کم ہو کر 1193 فٹ تک پہنچ گئی ہے۔ ڈیم میں پانی کی آمد 22082کیوسک فٹ جبکہ اخراج 23261کیوسک فٹ رہا۔