چکوال میں ہندؤوں کے مقدس مقام کٹاس راج کو محفوظ بنانے کیلئے پاکستان کو مکمل تعاون کی پیشکش کرتے ہیں، بھارت:
چکوال (اُردو پوائنٹ۔9ستمبر۔2007ء) پاکستان میں بھارت کے ہائی کمشنر سیتا براتہ پال نے کہا ہے کہ چکوال میں ہندؤوں کے مقدس مقام کٹاس راج کو محفوظ بنانے کیلئے بھارت رضا کارانہ طور پر خدمات دینے کیلئے تیار ہے، حکومت پاکستان اگر اجازت نہیں دیتی تو دنیا بھر میں مقیم بھارتی تاجروں کو اس کام کیلئے اپنی خدمات پیش کرنی چاہیے، مذہبی تعلقات کی زیارت کیلئے ویزوں میں مزید نرمی ہونی چاہیے، پاکستان اور بھارت کے بہتری کی جانب گامزن ہیں۔ ان خیالات کا اظہار انہوں نے اتوار کے روز چکوال کے مقدس مقام کٹاس راج کی زیارت کے موقع پر اخبار نویسوں سے گفتگو کرتے ہوئے کیا۔ انہوں نے کہاکہ یہ ہندؤوں کا سب سے بڑا مقدس مقام ہے اور ان کی مذہبی کتاب مہا بھارت بھی یہاں پر لکھی گئی ہے اور اب حکومت پاکستان کی طرف سے ایک عظیم مذہبی اور ثقافتی ورثے کو محفوظ کرنے کیلئے 12کروڑ روپے کی رقم فراہم کی گئی ہے جو کہ پورے ہندوستان کیلئے قابل اطمینان ہے۔ انہوں نے پیشکش کی کہ اس عظیم ورثے کو محفوظ کرنے کیلئے بھارتی ماہرین آثار قدیمہ کی خدمات رضاکارانہ طور پر ہم پیش کرنے کو تیار ہیں اور اگر حکومت پاکستان اجازت نہ دے تو پوری دنیا میں مقیم بھارتی تاجراس ثقافتی ورثے کو اپنے خرچے پر محفوظ کرنے کیلئے تیار ہیں کیونکہ کٹاس راج کی بحالی کا مقصد یہ ہے کہ یہاں ہر سال بیس لاکھ ہندو یاتریوں کی آمد یقینی ہو سکتی ہے۔ انہوں نے کہاکہ بھارت کے دوسرے مذہبی مقام پشکر راج پر ہر سال پوری دنیا سے 20 لاکھ ہندو حاضری دیتے ہیں اور اس سے ہندوستان کی حکومت کو اربوں روپے کا زرمبادلہ حاصل ہوتا ہے۔ انہوں نے کہا کہ کٹاس راج پر آ کر انہیں بڑا روحانی سکون محسوس ہوا ہے۔ اس موقع پر بھارتی ڈپٹی کمشنر من پریت بورھا بھی موجود تھے۔

__________________