پاکستان اور چین کے نمائندوں نے ہفتے کو بائیس معاہدوں پر دستخط کیے جوکہ دونوں ملکوں کے درمیان سالانہ تجارت کا حجم پچیس ارب ڈالر تک پہنچانے کے لیے متعین کردہ سینتیس معاہدوں کا حصہ ہیں۔ چین کے وزیر اعظم وین جیا باؤ اور پاکستان کے وزیر اعظم یوسف رضا گیلانی اس تقریب میں موجود تھے جس میں دونوں ملکوں کے نمائندوں نے سترہ معاہدوں اور پانچ یاداشتوں پر دستخط کیئے جن سے دونوں ملکوں کے درمیان مجموعی سالانہ تجارت کا حجم سن دو ہزار پندہ تک اٹھارہ ارب ڈالر تک پہنچ جائے گا۔

ان معاہدوں میں خلاء اور ماحول پر تحقیق کے معاہدے، چیمبر آف فیڈریشن، زراعت، کیمائی کھاد، خوراک، سمندری خوراک، بیجوں پر تحقیق اور مشینری کی درآمد اور برآمد کے مسودے شامل تھے۔ اس تقریب میں چین کے وزیر اعظم کے ہمراہ آئے ہوئے ڈھائی سو تاجروں اور پاکستان کے ڈیڑھ سو تاجروں نے بھی شرکت کی۔

اس سے قبل پاکستان کے وزیر خزانہ ڈاکٹر عبدالحفیظ شیخ نے چینی تاجروں سے کہا کہ وہ حکومتِ پاکستان کی طرف سے فراہم کردہ مراعات سے فائدہ اٹھاتے ہوئے پاکستان کے خصوصی اقتصادی زونوں میں سرمایہ کاری کریں۔اس سے قبل جمعہ کو دونوں ملک نے زراعت، صنعت، توانائی، سائنس اور بینکنگ کے شعبوں میں تیرہ معاہدوں پر دستخط کیے تھے۔ ہفتے کو پاکستان کے وزیر اعظم یوسف رضا گیلانی نے وزیر اعظم وین جیا باؤ کے اعزاز میں ظہرانہ دیا۔

اس ظہرانے میں چینی وزیر اعظم کے وفد کے ارکان کے علاوہ پاکستان کی اہم سیاسی شخصیات نے بھی شرکت کی۔ اس تقریب میں خطاب کرتے ہوئے وزیر اعظم گیلانی نے کہا کہ پاکستان ’ون چائنا پالیسی‘ کی بھرپور طریقہ سے حمایت کرتا ہے اور چین کی سلامیت اور خود مختاری کے خلاف کسی بھی اقدام کی مذمت کرتا ہے۔‘

انھوں نے کہا کہ دونوں ملک خطے میں امن چاہتے ہیں اور خطے کو کشیدگی اور تصادم سے پاک خطہ قرار دینا چاہتے ہیں۔ انھوں نے کہا کہ سن دو ہزار گیارہ میں دونوں ملک مشترکہ طور پر اپنی دوستی کی ساٹھویں سالگرہ منائیں گے۔

بی بی سی سے اقتباس

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com