30 ستمبر 2010
پشاور ( مانیٹرنگ ڈیسک ) پاکستانی علاقے اور سیکیورٹی چیک پوسٹ پر نیٹو حملے کے بعد پاکستان نے رد عمل میں نیٹو کی سپلائی لائن معطل کردی ہے اور اس کے آئل ٹینکر اور دواسے کنٹینرز مختلف مقامات پر روک لئے ہیں ۔بتایا گیا ہے کہ پاکستان نے نیٹو کی کارروائی کا سخت نوٹس لیا اور اپنے ابتدائی رد عمل کا اظہار نیٹو کی سپلائی لائن کاٹ کر کیا ہے غیر مصدقہ اطلاعات کے مطابق بعض مسلح اہلکار ان کنٹینرز اور ٹینکرز کی نگرانی بھی کررہے ہیں تاہم سرکاری طور پر یہ بتایا گیا ہے کہ نیٹو کے ٹینکرز اور کنٹینرز حفاظتی اقدامات کے تحت روکے گئے ہیں دوسر جانب نیٹو کی جانب سے ابھی تک پاکستانی حدود کی خلاف ورزی اور چیک پوسٹ پر براہ راست حملے کو بھی تسلیم نہیں کیا گیا اور صرف یہ کہا گیا ہے کہ ابھی اس معاملے کی تحقیقات کی جارہی ہیں ۔ پاکستان میں ڈرون حملوں ، پاکستانی سرحدی حدود کی خلاف ورزی اور ڈرون حملوں کیخلاف قبائیلی علاقوں اور صوبہ خیبر پختونخوا کے کئی علاقوں میں مکمل ہڑتال جاری ہے ۔ ان علاقوں میں بھی اتحادی افواج کی سپلائی لائن بند کرنے کا اعلان مقامی سطح پر کیا گیا ہے ۔ واضح رہے کہ وزیر اعظم یوسف رضا گیلانی نے امریکی سینٹر ل انٹیلی جنس ایجنسی کے سربراہ لیون پنٹا سے مطالبہ کیا ہے کہ پاکستانی حدود کے اندر ڈرون حملے بند کیے جائیں اور پاک افغان سرحد پرعسکریت پسندوں کی نقل و حرکت بارے سی آئی اے، پاکستانی سیکیورٹی فورسز کے ساتھ خفیہ معاملات کا بروقت تبادلہ کرے۔آ ج اسلام آباد میں سی آئی اے کے سربراہ لیون پنٹا نے اسلام آباد میں وزیر اعظم سید یوسف رضا گیلانی سے ملاقات کی۔ ملاقات میں آئی ایس آئی کے سربراہ جنرل احمد شجاع پاشا بھی شریک تھے۔ وزیر اعظم سید یوسف رضا گیلانی نے کہا کہ ڈرون حملے دہشت گردی کے خلاف جنگ میں معاون ثابت نہیں ہو رہے۔اُنہوں نے کہا کہ ڈرون ٹیکنالوجی پاکستان کے حوالے کی جائے اور پاکستانی سا لمیت،زمینی اورفضائی حدود کا احترام کیا جائے۔وزیراعظم گیلانی نے ڈاکٹر عافیہ صدیقی کی رہائی کا معاملہ بھی اٹھایا اور سی آئی اے کے سربراہ سے کہا کہ وہ اِس سلسلے میں اپنا اثر و رسوخ بھی استعمال کریں۔ دوسری جانب وزیر داخلہ رحمٰن ملک نے کہاہے کہ پاکستان میں حملوں کے حوالے سے پاکستان،نیٹواور امریکہ کے درمیان کوئی خفیہ معاہدہ نہیں ہے اور نیٹو کے حالیہ حملوں کے بعد بات صر ف مذمت تک محدود نہیں رہے گی بلکہ دوست اوردشمن میں فرق واضح کیا جائے گا۔پارلیمننٹ ہاﺅس کے باہر میڈیا سے گفتگو کرتے ہوئے دہشت گردی کے خلاف جنگ میں اتحادیوں کے شانہ بشانہ چل رہے ہیں لیکن ہمارے سیکیورٹی فورسز کو نیٹو کی جانب سے نشانہ بنانا لمحہ فکریہ ہے۔اُنہوں نے کہا کہ اِس معاملے پر وزارت خارجہ نے نیٹو سے احتجاج کیا ہے اور امریکی سفیر کو بھی طلب کیا جائے گا۔اُن کا کہنا تھا کہ معاملے کی تحقیقات کر رہے ہیں کہ حملہ غلطی سے ہو ا یا جان بوجھ کر کیا گیا۔

__________________
جاویداسد