26 اگست 2010
لاہور (مانیٹرنگ ڈیسک) صوبائی وزیر قانون رانا ثناءاللہ کا کہنا ہے کہ ڈاکو ہلاک کر کے لاشوں کو سر عام گھمانے کا کلچر سابق آر پی او گوجرانوالہ ذوالفقار چیمہ نے فروغ دیا ہے۔ جیو نیوز سے انٹرویو میں انہوں نے کہا ماضی میں کسی عدالت نے لاشیں سرعام گھمانے پر از خود نوٹس نہیں لیا ۔ سول سوسائٹی بھی پولیس پر پھولوں کی پتیاں نچھاور کرتی رہی۔ انہوں نے کہا کہ کسی بھی پولیس افسر کو اس بات کی اجازت نہیں کہ وہ شہریوں کو مار کر ان کی لاشیں گھمائیں۔ جیو نیوز کے مطابق سانحہ سیالکوٹ میں پولیس کے کردار پر برہم نظر آنے والے صوبائی وزیر قانون رانا ثناءاللہ کچھ عرصے پہتے تک ملزمان کو جان سے مارنے اور انہیں سڑکوں پر گھمانے والے پولیس افسروں کی کی تعریفیں کیا کرتے تھے لیکن اب انہوں نے یو ٹرن لے لیا ہے ۔ پنجاب کے ایک بدنام زمانہ اشتہاری ملزم کو پولیس مقابلے میں ہلاک کرنے کے بعد گاڑی میں رکھ کر شہر میں گھمایا گیا ۔ پولیس کے اس کارنامے کا ذکر وزیر اعلیٰ پنجاب شہباز شریف نے تو اپنی تقریروں میں کیا ہی لیکن صوبائی وزیر قانون رانا ثناءاللہ ایک قدم آگے بڑھے اور ملزم کو ہلاک کرنے والے افسروں کو اسناد اور میڈل بھی دیئے ۔ ساتھ ہی یہ بھی کہا کہ کوئی ملزم خواہ کتنا ہی طاقتور کیوں نہ ہو اگر وہ ریاست سے ٹکرائے گا تو اس کا یہی حشر ہو گا۔ انہوں نے کہا ڈی آئی جی ذوالفقار چیمہ کے ساتھ کام کرنے والی ٹیم نے بدمعاشوں کو چوراہوں میں کتے کی طرح بھونکنے پر مجبور کر دیا ہے۔

__________________
جاویداسد