اسلام آباد (جنگ نیوز) ممتاز صحافی اور سینئر تجزیہ نگار ڈاکٹر شاہد مسعود نے پاکستان ٹیلیویژن کے چیئرمین کی حیثیت سے ہفتہ کو باقاعدہ طورپر اپنی ذمہ داریاں سنبھال لیں جبکہ منیجنگ ڈائریکٹر پی ٹی وی کا اضافی چارج بھی ان کے پاس ہوگا۔ ڈاکٹر شاہد مسعود اس سے قبل ملک کے دو بڑے نجی ٹی وی چینلز پر بھی اہم عہدوں پر فائز رہے، وہ اس سے پہلے جیو نیٹ ورک کے گروپ ایگزیکٹو ڈائریکٹر اور اے آر وائی کے سینئر ایگزیکٹو ڈائریکٹر کی حیثیت سے خدمات انجام دیتے رہے۔ ڈاکٹر شاہد مسعود نے رائل کالج آف سرجنز اور ایمپریل کالج لندن سے سرجری میں پوسٹ گریجویشن کی تعلیم حاصل کی اور اس کے بعد برطانیہ اور پاکستان کے مختلف ہسپتالوں میں خدمات انجام دیں جبکہ اس دوران تدریس کے شعبہ سے بھی وابستہ رہے۔ وہ ستمبر 2001ء سے الیکٹرانک میڈیا کے ساتھ وابستہ ہوئے۔ ڈاکٹر شاہد مسعود کو امریکی ٹی وی چینل سی این این نے2005ء میں سکالر شپ دیا، جس پر وہ امریکہ میں الیکٹرانک میڈیا کے جدید پہلوؤں سے روشناس ہوئے۔ڈاکٹر شاہد مسعود نے حالیہ سالوں میں افغانستان، عراق اور لبنان کی جنگوں کی کوریج کا اعزاز بھی حاصل کیا اور وہ تینوں ممالک کے اندر محاذ جنگ پر جا کر حالات و واقعات کی لائیو کوریج کرتے رہے اور اس دوران ان کے پروگراموں کو دنیا بھر میں انتہائی پذیرائی حاصل ہوئی۔ ڈاکٹر شاہد مسعود کے اے آر وائی پر پروگرام ”ویوز آن نیوز“ اور جیو ٹی وی پر ”میرے مطابق“ نے نہ صرف اندرون بلکہ بیرون ملک پسندیدگی کے نئے ریکارڈ قائم کئے۔ ڈاکٹر شاہد مسعود اپنے پروگراموں میں ملکی اور بین الاقوامی حالات پر کھل کر اپنی رائے کا اظہار کرتے، جس کی وجہ سے وہ کئی بار زیر عتاب بھی آئے تاہم انہوں نے کبھی کوئی دباؤ قبول نہ کیا۔ ڈاکٹر شاہد مسعود نے حال ہی میں امریکہ میں بین الاقوامی تعلیم عامہ کی قدیم ترین درس گاہ ”فلیچر سکول آف لا اینڈ ڈپلومیسی“ سے بین الاقوامی تعلقات عامہ اور دفاعی علوم میں ماسٹرز ڈگری بھی حاصل کی۔ ڈاکٹر شاہد مسعود کے قومی ٹیلیویژن کی سربراہی سنبھالنے سے اس امید کا اظہار کیا جا رہا ہے کہ پاکستان ٹیلی ویژن میں بھی اب ایک دور کا آغاز ہو گا اور پی ٹی وی معیار کی نئی بلندیوں کو چھوئے گا۔