18ستمبر 2010
لندن(مانیٹرنگ ڈیسک)برطانوی اخبارات نے لکھا ہے کہ جو لوگ پاکستان میں استحکام کی دعاکرتے ہیں ان کی خواہش ہو گی کہ لندن میں ڈاکٹر عمران فاروق کا قتل راہزنی کی واردات ثابت ہو اگر ایسا ہوا تو موجودہ مخلوط حکومت کی بقاءخطرے میں پڑ سکتی ہے۔ برطانوی اخبارات کا کہنا ہے کہ لندن پاکستانی سیاستدانوں کے لئے محفوظ پناہ گاہ کی حیثیت رکھتا ہے اگر ڈاکٹر عمران فاروق کی موت سیاسی قتل ثابت ہوئی تو اس سے پاکستانی سیاستدانوں کی اس محفوظ پناہ گاہ کا بھی خاتمہ ہو جائے گا اور اس کے نتیجے میں پاکستان کی صورتحال مزید ابتر ہو سکتی ہے۔ اخبار ڈیلی میل کے مطابق اس قتل میں طالبان ملوث ہو سکتے ہیں تاہم پاکستان میں کسی ممکنہ رد عمل کے خدشے کے باعث تفتیشی افسران اس خدشے کا اظہار نہیں کر رہے۔ یہ کیس مرڈر سکوارڈ سے لے کر کاﺅنٹر ٹیرر ازم کومنتقل کرنا بھی اس خدشے کو تقویت دیتا ہے۔ دوسری جانب گارجین کا کہنا ہے کہ عمران فاروق کے قریبی ساتھی اس واردات کو سیاسی قتل قرار دے رہے ہیں ۔ ان کاخیال ہے کہ یہ قتل دیگر پارٹی رہنماﺅں کومخالفین کی جانب سے دھمکی ہو سکتی ہے ۔ اخبار ڈیلی ٹیلی گراف نے اپنے تبصرے میں لکھا ہے کہ کیس کی تفتتش کے لئے برطانوی خفیہ ایجنسی ایم آئی فائیو سے بھی رابطہ کیا جا سکتا ہے۔ اخبار دی سن نے اپنی رپورٹ میں کہا ہے کہ مقتول کی اہلیہ شمائلہ فاروق اس واردات کی عینی شاہد ہیں ۔ قتل کے وقت انہوں نے چیخیں سن کر کھڑکی سے جھانکا تھا۔

__________________
جاویداسد