امریکا میں قید پاکستانی شہری ڈاکٹر عافیہ صدیقی کی بہن ڈاکٹر فوزیہ صدیقی نے کہا ہے کہ ان کی بہن کے خلاف فیصلے سے امریکی عدالتوں کے انصاف پسند ہونے کا ڈھنڈورا پیٹنے والوں کی آنکھیں کھل جانی چاہئیں۔ فیصلہ سنانے والا جج رچرڈ برمن دیکھ لے ہمارا سر فخر سے بلند ہے۔ غیرت نہیں رہے تو جغرافیہ ختم ہوجانا چاہیے اور قربانیوں کے نتیجے میں قوموں کی تاریخ بدل جاتی ہے۔ ان خیالات کا اظہار انہوں نے جمعرات کو شہدائے پنجاب ہال میں کراچی بار ایسوسی ایشن کے جنرل باڈی اجلاس سے خطاب کرتے ہوئے کیا۔
ڈاکٹر فوزیہ نے کہا کہ وہ شروع سے کہتی آئی ہیں کہ عافیہ صدیقی کی رہائی کے لیے ڈپلومیٹک چینل استعمال کیا جائے لیکن اس وقت وکلاء ان کی سادہ سی بات نہیں سمجھتے تھے۔ انہوں نے کہا کہ ان کی بہن کے خلاف امریکا میں غیر قانونی مقدمہ چلایا گیا جبکہ مقدمہ کی سماعت کا امریکا میں اختیار ہی نہیں تھا۔ انہیں یقین ہے کہ ان کی بہن اور قوم کی بیٹی ضرور وطن واپس آئے گی۔ یہ صرف عافیہ کا ہی نہیں بلکہ پوری مسلم امہ کا امتحان ہے۔
انہوں نے کہا کہ اگر امریکی عدالت عافیہ صدیقی کو بری کرتی ہے تو یہ قبول کرنے کے مترادف ہو تاکہ ان کے فوجی جھوٹے اور درندے ہیں۔ انہوں نے وکلاءکو مخاطب کرتے ہوئے کہا کہ آپ لوگوں کو حکومت سے کہنا چاہیے کہ اب بھی حکومت
این ڈبلیو پیٹرسن کی آمد پر 12 گز لمبا دستر خوان بچھائے گی۔
انہوں نے کہا کہ دنیا میں کبھی کسی ایک فرد کے لیے اتنے لوگ سڑکوں پر نہیں آئے، جتنے عافیہ صدیقی کے لیے نکلے ہیں۔ انہوں نے اپیل کی کہ اب ہمیں متحد ہونا ہوگا کیونکہ اسی میں ہماری عافیت ہے۔
قبل ازیں صدر کراچی بار محمود الحسن نے اپنے خطاب میں کہا کہ حکمرانوں نے بردہ فروشی کرتے ہوئے قوم کی بیٹی کو امریکا کے حوالے کرکے خاموشی اختیار کر رکھی ہے جو قابل مذمت ہے۔ انہوں نے کہا کہ ملک کی بیٹی کا سودا آمر نے کیا تھا مگر آج کے حکمران جو خود کو جمہوریت کا چیمپئن کہتے نہیں تھکتی، ان کی جانب سے ڈاکٹر عافیہ کیس کی درست پیروی نہ کرنا اور خاموشی افسوسناک ہے۔ انہوںنے کہا کہ حکومت کہتی ہے کہ ملک میں بلیک واٹر کا کوئی وجود نہیں،ان سے پوچھا جائے کہ دیر بم دھماکا کے وقت 3 امریکی فوجی وہاں کیا کررہے تھے۔ انہوں نے کہا کہ یہ ہماری ذمہ داری ہے کہ بردہ فروش حکمرانوں کے خلاف جدوجہد کریں۔ ملک بھر کے وکلاءڈاکٹر فوزیہ صدیقی کے ساتھ ہیں۔

__________________

دختراسلام ڈاکٹر عافیہ صدیقی اور ان کے اہل خانہ کی عظمتوں کو سلام۔
مدہوش حکمرانو! ہوش میں آؤ۔۔۔