اسلام آباد (نمائندہ جنگ) وفاقی حکومت نے امپورٹ پالیسی آرڈر 2007ء میں ترمیم کرتے ہوئے الیکٹرونک میڈیا کی فیلڈ (شعبہ) سے متعلق سٹیلائٹ سگنلز کی ریسیپشن، براڈ کاسٹ اور ڈسٹری بیوشن میں استعمال ہونے والے تمام آلات کی ملک میں عام درآمد پر پابندی عائد کردی ہے۔ ایسے آلات میں سٹیلائٹ ڈشز، ڈیکوڈرز، ریسیورز، ڈیجیٹل سٹیلائٹ نیوز گیدرنگ(dsng) اینکوڈر، ماڈیولیٹر، ہائی پاور ایمپلی فائر، انٹیگریٹڈ ڈیجیٹل ریسیور، براڈ بینڈ، گلوبل ایکسیس نیٹ ورک، ایل این اے، کم درجے کے ایمپلی فائر، ایل این بی، کم درجے کے فائر بلاک، کیمرہ مع ٹرانسمیشن سہولت اور ڈیجیٹل ہیڈ اینڈ وغیرہ شامل ہیں۔ وزارت تجارت کے جاری کردہ نوٹیفیکیشن کے مطابق یہ آلات اب پیمرا کی اجازت کے بعد ہی درآمد کئے جاسکیں گے۔ ذرائع کے مطابق اس اقدام کا مقصد ملک میں ڈش اینٹینا کی تیاری کو روکنا ہے جن کی ڈیمانڈ کیبل پر پرائیویٹ نیوز چینلز نہ دکھانے کے بعد سے بڑھ گئی ہے ۔ وزارت تجارت نے مذکورہ ترمیم درآمد وبرآمد ایکٹ (کنٹرول) 1950 کی سیکشن تین کی ذیلی شق (1) کے تحت حاصل کردہ اختیار کے تحت کی ہے۔

__________________