ڈکیتی و رہزنی کی وارداتوں پر دہشتگردی ایکٹ کا اطلاق ہوگا،رحمن ملک
کراچی ( اسٹاف رپورٹر ) وزیر اعظم کے مشیر برائے داخلہ رحمٰن اے ملک نے اتوار کو کراچی سمیت پاکستان کے تمام شہروں میں موبائل فون و کار چھیننے، رہزنی اور گن پوائنٹ پر ڈکیتیوں کا نوٹس لیتے ہوئے تمام صوبوں کے پولیس افسران کو ہدایت کی ہے کہ ایسے جرائم پر دہشت گردی ایکٹ کا اطلاق کیا جائے، وزیر اعظم کے مشیر برائے داخلہ رحمٰن اے ملک کی طرف سے تمام صوبوں کے پولیس افسران کو ہدایت جاری کی گئی ہے کہ جس علاقے میں ایسے جرائم ہوں اس علاقے کے ایس ایچ او کے خلاف فوری کارروائی کی جائے۔ مشیر داخلہ نے تمام صوبائی پولیس افسران کو یہ ہدایت بھی جاری کی ہے کہ وہ موبائل فون اور کار چھینے جانے ، رہزنی اور گن پوائنٹ پر ڈکیتی کے واقعات کی رپورٹ روزانہ نیشنل پولیس بیورو کو ارسال کرے تاکہ ان جرائم کے سدباب کیلئے اقدامات کا جائزہ لیا جا سکے۔ علاوہ ازیں مشیر داخلہ رحمن ملک نے کہا ہے کہ سانحہ 9 اپریل کی تحقیقات کی ہدایات جاری کر دی ہیں، امن و امان کے قیام کے لئے ہر ممکن اقدامات کئے جائیں گے۔ یہ بات انہوں نے اتوار کو یہاں سندھ سیکریٹریٹ میں سندھ کابینہ کے اجلاس کے بعد صحافیوں سے بات چیت کرتے ہوئے کیا۔ رحمن ملک نے سندھ کابینہ کے اجلاس میں خصوصی طور پر شرکت کی اور صوبہ سندھ خصوصاً کراچی میں قیام امن کے حوالے سے سندھ کابینہ کے ارکان سے تبادلہ خیال کیا،انہوں نے کہا کہ کراچی پولیس کو بھی شہر میں شرپسند عناصر سے نمٹنے کیلئے اور آئندہ اس طرح کے واقعات کی روک تھام کیلئے ہدایات دے دی گئی ہیں۔ مشیر داخلہ رحمن ملک نے کہا کہ کابینہ کے اجلاس میں فیصلہ کیا گیا ہے کہ 9 اپریل کو کراچی میں ہونے والے پرتشدد واقعات اور اس کے نتیجے میں 12 افراد کی ہلاکت کی مکمل تحقیقات کی جائیں گی اور ذمہ داران کے خلاف کارروائی بھی ہوگی۔ انہوں نے مزید کہا کہ کسی کو بھی کراچی کا امن تباہ کرنے کی اجازت نہیں دی جائے گی۔ رحمن ملک نے کہا کہ امن و امان کے قیام کے لئے ہر ممکن اقدامات کئے جائیں گے جبکہ انہوں نے کراچی پولیس کو بھی شہر میں شرپسند عناصر سے نمٹنے کے لئے اور آئندہ اس قسم کے واقعات کو روکنے کے لئے ہدایات دی ہیں۔

__________________