ڈکیت گروہ کا سرغنہ، بھائی اور ساتھیوں سمیت گرفتار
کراچی ( اسٹاف رپورٹر) اسلام آباد میں وزیراعظم کے ڈپٹی سیکرٹری کے گھر ڈکیتی کے ساتھ ساتھ کراچی میں درجنوں بینک، بنگلوں اور راہ گیروں کو لوٹنے والے ایک بین الصوبائی ڈکیت گروہ کے سرغنہ اور اس کے بھائی سمیت 4/ڈاکوؤں کو ڈیفنس کے علاقے سے گرفتار کرکے پولیس نے ان کے قبضے سے اسلحہ، منشیات اور ایک کار برآمد کرلی۔ پولیس کے مطابق ایک خفیہ اطلاع پر ڈیفنس پولیس نے ڈیفنس فیز ٹو، 14ویں ساؤتھ اسٹریٹ پر ڈاکوؤں کی کار کو گھیرے میں لے کر گروہ کے سرغنہ عمران عرف چوہدری عاطف عرف بھڑمل اس کے تین ساتھیوں کامران بھڑمل، طارق اور ارسلان عرف آصف کو گرفتار کرکے ان کے قبضے سے ایک کلاشنکوف، ایک نائن ایم ایم پستول، 2ٹی ٹی پستول، 2کلو گرام چرس اور 16لاکھ روپے مالیت کے سیونگ سرٹیفکیٹ برآمد کرلئے۔ گروہ کا سرغنہ عمران اور کامران سگے بھائی ہیں۔ مذکورہ ڈاکوؤں نے 2007ء میں اسلام آباد میں وزیراعظم کے ڈپٹی سیکرٹری محمد حفیظ کے بنگلے کولوٹ لیا تھا جس کا مقدمہ تھانہ مرگلہ اسلام آباد میں درج ہے۔ یہ ڈکیت کراچی میں وارداتوں کے بعد اسلام آباد اور اسلام آباد میں واردات کے بعد کراچی میں روپوش ہوجاتے تھے۔ ان کے خلاف کراچی کے ڈیڑھ درجن تھانوں کی حدود میں بینک لوٹنے، پولیس مقابلوں، بنگلوں کو لوٹنے سمیت متعدد سنگین مقدمات درج ہیں یہ 10سے زائد مرتبہ جیل بھی کاٹ چکے ہیں۔ ملزمان سے برآمد ہونے والی کار LEC-5263 پنجاب کے علاقے قصور سے لائی گئی تھی۔

__________________