اسلام آباد…عوامی نیشنل پارٹی کے مرکزی رہنما، وزیر ریلوے غلام احمد بلور نے کہا ہے کہ ملک میں کالا باغ ڈیم کی کوئی ضرورت نہیں، اس سے سندھ سوکھ کراورسرحد ڈوب کر مرے گا اورکوئی پنجابی اس پر اپنی قبر بھی نہیں بنائے گا ۔یہ بات انہوں نے وزیر اعظم یوسف رضا گیلانی سے لاہور میں ان کی رہائش گاہ پر ملاقات کے بعد میڈیا سے گفتگو میں کہی۔ غلام احمد بلور نے وزیر اعظم سے ملاقات میں اے این پی اورپیپلز پارٹی کی صوبہ سرحد میں مخلوط حکومت ،سیاسی صورتحال اور صوبے کے نام کے مسئلے پر تبادلہ خیال کیا۔بعد میں میڈیا سے گفتگو کرتے ہوئے غلام احمد بلور کاکہنا تھا کہ صوبے کا نام پختونخواہ رکھنا انا کا مسئلہ نہیں ہے بلکہ پختونوں کا تشخص بحال کرنا ہے جو انگریزوں نے مٹادیاتھا۔ انہوں نے ملک میں توانائی بحران کے حل کے لئے بھاشا ڈیم بنانے کی ضروت پر زور دیا۔ان کا کہنا تھاکہ کالا باغ ڈیم سے ان کے صوبے کو نقصان پہنچے گا۔
ملک میں کالا باغ ڈیم کی کوئی ضرورت نہیں،غلام احمدبلور