ژوب میں چار مشتبہ خودکش حملہ آور گرفتار، ہمارے بچے دہشتگرد نہیں، بیگناہ گرفتار کیاگیا،رشتہ دار

کوئٹہ:

رپورٹ ۔ زین الدین زیڈ‌ایف۔

بلوچستان کے ضلع ژوب میں سیکورٹی فورسز نے ایک ہوٹل پر چھاپہ مار کر 4مبینہ خودکش حملہ آور گرفتار کرلیا جنہیںتفتیش کے لیے نامعلوم مقام پر منتقل کردیا گیا ہے، خودکش حملہ آوروں کا تعلق وزیرستان سے ہے ۔ جبکہ گرفتار افراد کے رشتہ داروں‌کا کہناہے کہ گرفتار افراد مدرسے کے طلباء ہیں اور ان سے کوئی خودکش جیکٹس برآمد نہیں ہوئے۔

سیکورٹی فورسز ذرائع کے مطابق سیکورٹی فورسز نے حملہ آوروں کے ژوب میں داخل ہونے کی اطلاع پر حساس علاقوں کی سیکرٹی سخت کردی تھی۔ اتوار کو سیکورٹی فورسز کو خفیہ اطلاع ملی تھی کہ ژوب بس اڈے میں واقع دو ہوٹلوں میں چند مشتبہ افراد موجود ہیں جس پر سیکورٹی فورسزنے علاقے کو گھیرے میں لیکر دونوں ہوٹلوں پر چھاپے مارے اور چار مشتبہ افراد کو گرفتار کرلیا ۔سیکورٹی فورسز ذرائع کے مطابق گرفتار افراد سے دھماکے خیز مواد اورخودکش جیکٹس بھی برآمد ہوئی ہیں۔حملہ آوروں کا تعلق وزیرستان سے ہے جو کوئٹہ جاکرتخریب کاری کی وارداتیں کرناچاہتے تھے۔چاروںحملہ آوروں کو تفتیش کے لیے کوئٹہ کے نامعلوم منتقل کردیا گیا ہے ۔ ادھر گرفتار افراد کے رشتہ داروں نے بتایا ہے کہ گرفتار افراد مدرسے کے طالب علم اور مقامی ہیںان افراد میں غوث الدین، اجمل ، عبدالرحمن اور حیدر شامل ہیں۔انہوں نے اس الزام کی تردید کی ہے کہ ان کے بچے خودکش حملہ آور ہیں۔
٭٭٭٭٭٭٭٭٭