کراچی، پشاور(اسٹاف رپورٹر، ایجنسیاں) ملک میں ایمرجنسی اور پیپلز پارٹی چیئر پرسن بینظیر بھٹو کی گرفتاری کیخلاف اور غیر جانبدارانہ وشفاف انتخابات کیلئے پاکستان پیپلزپارٹی کے کارکنوں نے کراچی میں احتجاجی مظاہرے کئے جبکہ پشاور میں نواز لیگ اور پی پی نے مشترکہ احتجاج کیا۔ پولیس نے مظاہرین کو منتشر کرنے کیلئے لاٹھی چارج کیا اور جبکہ رضا ربانی سمیت سیکڑوں کارکنوں کو گرفتار کرلیا۔ پاکستان پیپلزپارٹی کی طرف سے سب میرین چورنگی پر ایمرجنسی کے خلاف مظاہرہ کیا اس موقع پر سخت حفاظتی انتظامات کئے گئے تھے ٹی پی او کلفٹن ایس پی آصف اعجاز شیخ پولیس کی بھاری نفری کے ہمراہ موقع پر موجود تھے مظاہرین جیسے ہی سب میرین چورنگی پر پہنچے تو پولیس نے لاٹھی چارج کے بعد مظاہرین کو پکڑ کرپولیس موبائلوں میں بٹھا کر کلفٹن اورگذری تھانہ پہنچادیا اس موقع پر پولیس اور پیپلزپارٹی کے رہنما کارکنوں میں ہاتھا پائی اور دھکم پیل ہوئی پولیس نے پیپلزپارٹی کے دوسو کے قریب رہنماؤں اور کارکنوں کو گرفتار کیا جن میں سینیٹررضا ربانی ، نواب یوسف تالپور، رفیق انجینئر ، آفاق شاید، حبیب خان، فرید انصاری، سعید چاؤلہ، مرزا مقبول، ذوالفقار قائم خانی، نصیرہ شاکر، فرزانہ بلوچ، شہلہ رضا، شاہدہ رحمانی، منیر النساء بلوچ، عامر شاہ، غوث علی شاہ، کوثر عابدی، محمداقبال شوکت گلگتی شامل تھے۔ گرفتاری کے وقت پیپلزپارٹی کے کارکن وکٹری کا نشان اور وزیراعظم بینظیر اور گو مشرف گو کے نعرے لگارہے تھے بعد ازاں سینیٹر میاں رضاربانی، نواب یوسف تالپور، رفیق انجینئر اور آفاق شاید کو درخشاں تھانے منتقل کردیاگیا ۔پیپلزپارٹی سندھ کے صدر سید قائم علی شاہ ، وقار حیدر، فہمیدہ مرزا، راشد ربانی اور سعید نے درخشاں تھانہ کلفٹن گذری تھانے میں جاکر سینئر رہنماؤں اور کارکنوں سے ملاقات کی اور انہیں خراج تحسین پیش کیا۔ دریں اثناء پریس کلب کے باہر جمعرات کو پولیس نے پیپلز پارٹی کے 18اور عوامی تحریک سے تعلق رکھنے والے 4 مظاہرین کو گرفتار کرکے آرٹلری میدان منتقل کردیا۔ لیاری میں سادہ کپڑوں میں پولیس والے بھی بڑی تعداد میں تعینات تھے ۔ علاقے میں نامعلوم افراد نے ایک بس اورایک کوسٹر کو نذر آتش کردیا۔

__________________