کراچی (اسٹاف رپورٹر) ایمرجنسی کے نفاذ اور میڈیا پر عائد پابندیوں کے خلاف کراچی میں جیو کے دفتر کے سامنے صحافیوں نے مظاہرہ کیا ۔ احتجاج میں جیو کے کارکنان اور میڈیا کے نمائندوں نے شرکت کی ۔ شرکاء سے کراچی پریس کلب کے صدر صبیح الدین احمد غوثی، کراچی یونین آف جرنلسٹس کے صدر شمیم الرحمن، ایسوسی ایشن آف ٹی وی جرنلسٹس کے سیکریٹری جنرل فیصل عزیز خان اوردیگر صحافی تنظیموں کے عہدیداروں نے خطاب کیا۔ مقررین نے میڈیا پر پابندیوں کی مذمت کی اور جیو کی نشریات بحال کرنے اور پیمرا ترمیمی آرڈیننس واپس لینے کا مطالبہ کیا۔ مقررین نے کہا کہ جیو کی نشریات معطل کر کے حکمرانوں نے لڑاؤ اور حکومت کرو کی پالیسی پر عمل کیا ہے لیکن صحافی متحد ہیں۔ آزادیٴ صحافت کی جدوجہد تمام نجی ٹی وی چینلز پر عائد پابندیوں کے خاتمے اور پیمرا ترمیمی آرڈیننس واپس لینے تک جاری رہے گی ۔ صبیح الدین غوثی-: آزادی کے بغیر پاکستان ترقی نہیں کرسکتا۔ صحافیوں نے آزادیٴ صحافت کے لئے کوڑے کھائے، جیلیں بھگتیں اورآزادی حاصل کی اب بھی آزاد صحافت کے لئے ہر ممکن جدوجہد جاری رکھیں گے ۔ فیصل عزیز خان -: جیو نیوز کو حکومت کو کھولنا ہی ہوگا اور پیمرا ترمیمی آرڈیننس واپس لینا ہوگا اس کے بغیر صحافی خاموش نہیں بیٹھیں گے ۔ حکومت کی بات تسلیم نہیں کرتے کہ یہ پروگرام بند کریں یا کسی پروگرام کے میزبان کو ہٹایا جائے۔ صحافتی اصولوں کے مطابق آزادیٴ صحافت حکومت کو پاکستان میں بحال کرنا ہوگی۔ شمیم الرحمن-: ایکشن پلان دے دیا گیا ہے جدوجہد جاری رکھی جائے اس وقت تک جب تک آزادی صحافت کے تقاضے پورے نہیں ہوجاتے۔ جیو نیوز کو بند رکھ کر حکومت نے دہرے معیار کا ثبوت دیا ہے۔

__________________