کراچی: این اے 245 میں الیکشن مہم شرو ع نہیں ہو سکی



کراچی (اسٹاف رپورٹر) پیپلز پارٹی کی چیئرپرسن محترمہ بے نظیر بھٹو کی شہادت کی وجہ سے الیکشن کی رونقیں یکدم ماند پڑگئیں ہیں۔ این اے 245 میں تاحال فضا سوگوار ہے اور الیکشن مہم شروع نہیں ہوسکی۔ حلقہ این اے 245 میں ناظم آباد اور نارتھ ناظم آباد کے علاقے شامل ہیں حلقے میں کل ووٹروں کی تعداد تقریباً 288020 ہے۔ جس میں مرد ووٹروں کی تعداد 153079 ہے جبکہ خواتین ووٹرز کی تعداد 134941 ہے اس حلقہ سے ایم کیو ایم کے فرحت محمد خان ، پاکستان پیپلز پارٹی کے قاضی محمد بشیر، مسلم لیگ (ن) کے محمد اسلم خان خٹک اور اے این پی کے جمعہ خان بابر مقابلے میں شریک ہیں۔ توقع ہے کہ یوم عاشورہ کے بعد سے تمام سیاسی پارٹیاں باقاعدہ طور پر الیکشن کے لائحہ عمل کا تعین کریں گی۔