کراچی (اسٹاف رپورٹر) ریلوے حکام کی جانب سے کراچی تا پنجاب 4/ ٹرینوں کی روانگی کے اعلان کے بعد بدھ کے روز قراقرم ایکسپریس، تیز گام، سپر ایکسپریس کینٹ اسٹیشن سے روانہ ہوئیں جبکہ چوتھی ٹرین خیبر میل جسے پشاور سے پہنچنے پر روانہ کیا جانا تھا 11/ بجکر 30/ منٹ تک کراچی نہیں پہنچی تھی جس کی وجہ سے اسٹیشن پر مسافروں کا ہجوم رہا جنہیں شدید سردی میں سخت اذیت اور پریشانی کا سامنا رہا یہاں یہ امر بھی حیران کن ہے کہ کراچی تا ٹنڈو آدم ریلوے ٹریک بحال ہونے کے باوجود شاہ لطیف ایکسپریس، سکھر ایکسپریس، مہران ایکسپریس اور کے ٹو پسنچر ٹرین تاحال بحال نہیں ہوسکیں جس کی وجہ سے کراچی اور اندرون سندھ کے مسافر سخت پریشان ہیں۔ واضح رہے کہ 27/ مسافر ٹرینوں کے ذریعے تقریباً ایک لاکھ سے زائد مسافر یومیہ سفر کرتے ہیں جبکہ فی الحال صرف 4/ ٹرینوں کی آمدورفت بحال ہوئی ہے ریلوے انتظامیہ کی جانب سے بدھ کو بھی بڑی تعداد میں مسافروں کوٹکٹ ریفنڈ کئے گئے جبکہ یکم جنوری کو قراقرم اور خیبر میل کی بحالی کے بعد جو مسافر اسٹیشن نہیں پہنچ سکے تھے ان کو بھی ریفنڈ کیا گیا۔دریں اثناء ڈویژنل کمرشل آفیسر ریلوے کاشف رشید یوسفانی نے ”جنگ“ کو بتایا ہے کہ جمعرات 3 جنوری کوکراچی کینٹ اسٹیشن سے 8 ٹرینیں چلائی جائیں گی جن میں سپر ایکسپریس، تیزگام، قراقرم ایکسپریس، خیبر میل، علامہ اقبال ایکسپریس، بلوچستان ایکسپریس، بہاؤ الدین ذکریا اور ملت ایکسپریس شامل ہیں۔