کراچی میں تقریبات کی منسوخی، مرغی کے گوشت کی قیمت میں 14روپے کمی



کراچی (اسٹاف رپورٹر) امن و امان کی مخدوش صورتحال کے باعث کراچی میں منسوخ ہونے والی تقریبات سے برائیلر مرغی کی ڈیمانڈ میں 30 سے 35 فیصد تک کی کمی واقع ہوئی ہے جس کی وجہ سے پولٹری ڈیلرز کو مرغی کے گوشت کی قیمت 14روپے فی کلو کم کرنا پڑی ہے۔ کراچی ہول سیلرز پولٹری ایسوسی ایشن کے جنرل سیکرٹری کمال اختر صدیقی کا کہنا ہے کہ ایک جانب مرغی کی ڈیمانڈ کم ہو گئی ہے دوسری جانب پولٹری فارمرز کو فیڈ کی سپلائی بھی تعطل کا شکار ہوئی ہے کیونکہ فیڈ کی سپلائی پر مامور کئی ٹرک جلادیئے گئے ہیں ان حالات میں ڈیلرز نے مارکیٹ میں سپلائی بڑھا دی ہے یہی وجہ ہے کہ جمعرات کو برائیلر زندہ کی قیمت 18روپے کمی کے بعد 68روپے جبکہ گوشت کی قیمت 14روپے کمی کے بعد 116 روپے مقرر کی گئی ہے۔