…کراچی کے علاقے ابو الحسن اصفہانی روڈ پر دھماکے میں موٹرسائیکل سوار دو افراد ہلاک ہوگئے۔ ایس ایچ او مبینہ ٹاوٴن یعقوب سموں نے جیو نیوز سے گفتگو میں کہا کہ موٹرسائیکل میں دھماکے سے ہلاک ہونے والے افراد مبینہ خود کش حملہ آور تھے۔ پولیس کا کہنا ہے کہ مبینہ خودکش حملہ آوروں کے اعضاء تفتیش کیلئے جمع کرلئے گئے ہیں۔ ایس ایس پی شرقی احسن عمر نے جیو نیوز کو بتایا کہ آج ہونے والی دہشت گردی کی واردات میں ہلاک ہونے والا ایک شخص ممکنہ طور پر خودکش حملہ آوار تھا جبکہ دوسرا اس کو ڈراپ کرنے جارہا تھا۔ پولیس کے مطابق ملزمان ممکنہ طور پیر کسی دہشت گردی کی واردات پر جارہے تھے کہ خود دہشت گردی کا نشانہ بن گئے۔ احسن عمر نے مزید بتایا کہ بم ڈسپوزل اسکواڈ کے ماہر شواہد جمع کررہے ہیں۔ تین سے چار کلودھماکہ خیز موادتھا جس سے دھماکا ہوا۔ حتمی رپورٹ وہی دینگے۔دھماکا بہت زور دار تھا ،تاہم خوش قسمتی سے شہریوں کا بڑا جانی نقصان ہونے سے بچ گیا۔ رینجرز نے ابوالحسن اصفہانی روڈ پر دھماکے کی جگہ سے چار مشتبہ افراد کو حراست میں لے لیا۔

بشکریہ جنگ