کراچی (اسٹاف رپورٹر) کراچی کے پانچوں ضلعوں میں منگل کو تمام عدالتوں کا بائیکاٹ کیا گیا جس کی وجہ سے کئی ہزار مقدمات کی سماعت ملتوی کردی گئیں، جیل سے قیدیوں کو نہیں لایا گیا کراچی بار ایسوسی ایشن کے صدر محمود الحسن، سیکریٹری نعیم قریشی، نائب صدر مشتاق جہانگیری، فتح علی شاہ، وحید بلوچ وغیرہ نے جنرل باڈی سے خطاب کیا اور یہ موقف اختیار کیا کہ جسٹس (ر) رانا بھگوان داس کی نظر بندی خلاف قانون ہے،نظر بندی فوری طورپر ختم کی جائے۔ لانڈھی میں غریبوں کی بستی میں بم دھماکہ کی مذمت کی اور یہ موقف اختیار کیا کہ یہ انتظامیہ کی غفلت کا نتیجہ ہے۔ دھماکہ میں ہلاک ہونے والے افراد کو معقول معاوضہ دیا جائے، یہاں کے افراد غریب ہیں ان کا کسی دہشت گرد تنظیم سے تعلق نہیں ہے۔ ملیر بار ایسوسی ایشن کے صدر ظہور مہر اور نائب صدر اشرف سموں نے خطاب کیا اور فوری طورپر رانا بھگوان داس کی نظر بندی ختم کرنے کا مطالبہ کیا۔