اسلام آباد…وزیر اعظم کے مشیرداخلہ رحمان ملک نے کہاہے کہ کراچی میں امن تباہ کرنے والوں کو واضح طور پر پیغام دے دیاگیاہے کہ کراچی سمیت ملک میں کہیں بھی بدامنی اورتشدد برداشت نہیں کیاجائے گا اور ایسا کرنے والوں سے آہنی ہاتھ سے نمٹاجائے گا۔اسلام آباد میں سارک ممالک کے پولیس سربراہان کے پاکستان میں ہونے والے پہلے اجلاس سے خطاب کے بعد صحافیوں سے گفتگو کرتے ہوئے مشیر داخلہ نے کہاکہ پاکستان میں امن وامان پر کوئی کمپرومائز نہیں کیاجائے گا۔انہوں نے کہاکہ سیاسی اجتماعات پر کوئی پابندی نہیں لگائی گئی تاہم اس حوالے سے سیکورٹی کے مسائل سے نمٹنے کے لئے کسی بھی اجتماع سے پہلے انتظامیہ کو اطلاع اوراجازت کی شرط رکھی گئی ہے ۔ انہوں نے بتایاکہ فاروق ایچ نائیک محترمہ بے نظیر بھٹو کے قتل کی تحقیقات اقوام متحدہ سے کرانے کے لئے دستاویز تیار کررہے ہیں جبکہ وفاقی وزارت داخلہ نے اب تک قتل کے حوالے سے ہونے والی تمام تحقیقاتی رپورٹس طلب کرلی ہیں۔مشیرداخلہ نے کہاکہ ارباب رحیم کی آصف زرداری پرقتل کی سازش کاالزام لگانا ان کی اپنی ذہنی پیدوارہے اوراس میں کوئی حقیقت نہیں ۔انہوں نے کہاکہ ملک میں قانون کی حکمرانی ہرصورت میں قائم کی جائے گی اوراس کے لئے دہشت گردوں کو ہتھیارڈالنے ہوں گے اور جو عناصرہتھیار ڈالیں گے ان سے بات چیت کی جائے گی۔

__________________