کراچی (اسٹاف رپورٹر) ناظم کراچی سید مصطفیٰ کمال نے کراچی کے شہریوں کی طرف سے سول سوسائٹی ، وکلا اور میڈیا سے استفسار کیا ہے کہ 27 دسمبر کو بے نظیر بھٹو کی شہادت کے بعد کراچی میں ہونے والی تاریخ کی بدترین تباہی ، انسانوں کو زندہ جلانے ، لوٹ مار کرنے اور ہزاروں گاڑیوں کی آتشزدگی پر وہ کیوں خاموش ہیں۔ ان خیالات کا اظہار انہوں نے اپنے دفتر میں صحافیوں سے غیر رسمی بات چیت کرتے ہوئے کیا۔ اس موقع پر انہوں نے ایک سوال کے جواب میں کہا کہ کراچی میں ہونے والے نقصانات کے ازالے کے لئے وفاتی و صوبائی حکومت سنجیدہ ہے اور اس سلسلے میں جلد ریلیف پیکیج کا اعلان کیا جائے گا۔ انہوں نے کہا کہ اس صورتحال کا ایک افسوسناک پہلو یہ بھی ہے کہ بعض حلقے یہ پروپیگنڈہ کررہے ہیں کہ جب بلوائی شہر میں فساد کررہے تھے اس وقت پولیس اور رینجرز کہاں تھی، یہ سوال تو اپنی جگہ ہے مگر خواتین کی عزتیں لوٹنے والوں ، گاڑیاں اور انسانوں کو زندہ جلانے ، املاک کو تباہ کرنے اور شہریوں کو یرغمال بنانے والوں کی کوئی ایک آدمی بھی نشاندہی نہیں کررہا ہے جبکہ ہر کسی کو اس بات کا علم ہے کہ شہر میں کس نے تباہی مچائی ہے۔ انہوں نے کہا کہ ماضی میں شہر میں ہونے والے بعض واقعات پر سول سوسائٹی ، میڈیا اور وکلا سمیت تمام سیاسی جماعتیں یکطرفہ پروپیگنڈہ کرتی رہیں۔