11 نومبر 2010
کراچی(مانیٹرنگ ڈیسک)کراچی شہر میں گزشتہ مہینے بھی صوفی بزرگ حضرت عبداللہ شاہ غازی کے مزار کو سات اکتوبر کو نشانہ بنایا گیا۔ کراچی کو دو ہزار دو سے لے کر اب تک آٹھ مرتبہ دہشت گردی کانشانہ بنایا گیا۔ جیو نیوز کے مطابق دو ہزار دو میں کراچی شیرٹن ہوٹل کے قریب فرانسیسی انجینئرز کی بس پر حملہ کیا گیا جس میں سات انجینئرز مارے گئے۔ سات مئی دو ہزار چار کو حیدر مسجد میں ہونے والے خود کش دھماکے میں انیس افراد جاں بحق اور سو سے زائد زخمی ہوگئے۔ ستائیس مئی دو ہزار چار کو پی ایس سی سی کی کار پارکنگ میں ہونے والے دو دھماکوں میں ایک پولیس اہلکار جاں بحق اور بہتر زخمی ہو گئے۔ اکتیس مئی دو ہزار چار کو جامع مسجد علی رضا میں ہونےوالے خود کش حملے میں سولہ افراد جاں بحق اور اڑتیس زخمی ہو گئے۔ دو مارچ دو ہزار چھ کو امریکی قونصلیٹ کی کار پارکنگ میں خود کش حملہ آور نے بارود سے بھری گاڑی قونصل خانے کی دیوار سے ٹکرا دی جس میں ایک امریکی سفارتکار سمیت چار افراد مارے گئے۔ اٹھائیس دسمبر دو ہزار نو کو یوم عاشورہ کے جلوس میں ہونے والے دھماکے میں ساٹھ افراد جاں بحق اور ڈیڑھ سو سے زائد زخمی ہو گئے۔ پانچ فروری دو ہزار دس کو امام حسین کے چہلم میں شرکت کے لئے جانے والی بس پر حملہ کیا گیا جس میں بارہ افراد اپنی جانوں سے ہاتھ دھو بیٹھے۔ کچھ دیر بعد جناح ہسپتال میں ایمرجنسی کے باہر ہونے والے ایک اور بم دھماکے میں تیرہ افراد جاں بحق ہوگئے ۔ سات اکتوبر دو ہزار دس کو عبداللہ شاہ غازی کے مزار پر دو دھماکے ہوئے جس کے نتیجے میں دس افراد جاں بحق ہوئے۔

__________________
جاویداسد