کرم ایجنسی : رحمن ملک نے فائربندی کرادی، آج مورچے خالی ہوجائینگے، رات گئے میزائل حملہ
اسلام آباد/ پارا چنار(جنگ نیوز) وزیر اعظم یوسف رضا گیلانی اورپاکستان پیپلز پارٹی کے شریک چیئرمین آصف علی زرداری کی خصوصی ہدایت پر وزیراعظم کے مشیر داخلہ رحمن ملک کرم ایجنسی میں متحارب فریقوں کے درمیان مکمل فائر بندی کرانے میں کامیاب ہو گئے اور اس فائر بندی پر اتوار کی شام سے مکمل عمل شروع ہو گیا جبکہ متحارب فریق (آج) پیر کی صبح اپنے مورچے خالی کر دیں گے اور اس کے ساتھ مرکزی شاہراہ ٹل پاڑا چنار روڈ بھی ٹریفک کیلئے کھول دی جائے گی، وفاقی حکومت کی طرف سے کرم ایجنسی کے متاثرہ عوام میں راشن کی تقسیم بھی شروع ہو گئی ہے،دریں اثناء اتوار کو تازہ لڑائی میں مزید 10افراد ہلاک اور 20زخمی ہوگئے۔ تفصیلات کے مطابق پیپلز پارٹی کے شریک چیئرمین آصف علی زرداری نے کرم ایجنسی میں امن و امان کی مخدوش صورتحال کا نوٹس لیتے ہوئے وزیراعظم کے مشیر برائے داخلہ رحمن ملک کو مشن سونپا کہ کرم ایجنسی میں امن و امان بحال کرنے کیلئے فوری اقدامات کئے جائیں، اس مشن کی تکمیل کیلئے وزیراعظم کے مشیر برائے داخلہ کی ہدایت پر گورنر سرحد اویس احمد غنی اور پاکستان آرمی کی پوری مدد سے ریجنل کوآرڈینیشن آفیسر کوہاٹ عمر آفریدی نے اتوار کی صبح پاڑا چنار میں قبائلی زعماء کے ساتھ چار گھنٹے طویل جرگہ منعقد کیا اور دوسرے فریق کے قبائلی عمائدین کے ساتھ بھی بات چیت کی جس میں فیصلہ کیا گیا کہ اتوار کی شام پانچ بجے سے پوری کرم ایجنسی میں مکمل طور پر فائر بندی ہو گی اور دونوں فریقین جو ٹل پاڑا چنار روڈ پر مورچہ زن ہیں وہ (آج) پیر کی صبح اپنے مورچے ایف سی کے حوالے کر دیں گے ۔اس کے علاوہ کرم ایجنسی کے تمام مسائل کو حل کرنے کے لئے قبائلی زعماء کا لویہ جرگہ بھی اگلے دو تین روز میں منعقد ہو گا ۔ دریں اثناء وفاقی حکومت نے کرم ایجنسی کے عوام کو ریلیف کی فراہمی بھی فوری طور پر شروع کر دی ہے اور وزیراعظم کے مشیر برائے داخلہ رحمن ملک کی ہدایت پر کرم ایجنسی کے پولیٹیکل ایجنٹ ظہیر الاسلام نے اتوار کو لوگوں میں راشن تقسیم کیا۔رات گئے کرم ایجنسی میں تازہ حملے میں 2 افراد ہلاک اور 10 سے زائد زخمی ہو گئے ہیں۔ میزائل اور مارٹر توپوں کے حملے کے بعد لوگوں نے علاقے سے محفوظ مقامات کی طرف نقل مکانی شروع کر دی ہے۔

__________________