کسٹم ایجنٹس کے وفد کی چیف کلکٹر ساوٴتھ سے ملاقات، مسائل سے آگاہ کیا



کراچی (اسٹاف رپورٹر) کراچی کسٹم ایجنٹس ایسوسی ایشن کے صدر علی اصغر طاہر کی سربراہی میں جنرل سیکرٹری ارشد جمال، جوائنٹ سیکرٹری حسن شیخ اور ممبر مینجنگ کمیٹی توفیق چٹنی پر مشمتل وفد نے چیف کلکٹر ساوٴتھ منیر قریشی سے ملاقات کی اور انہیں ٹریڈ سے متعلق مسائل سے آگاہ کیا۔ علی اصغر طاہر نے کہا کہ درآمد کنندہ کی جانب سے غلط ڈیکلریشن پر ایف آئی آر میں درآمد کنندہ کے ساتھ بلا تحقیق کسٹم ایجنٹس کو نامزد کردیا جاتا ہے جو زیادتی کے مترادف ہے۔ ارشد جمال نے چیف کلکٹر کی توجہ اس دیرینہ مسئلہ کی جانب دلاتے ہوئے کہا کہ درآمد کنندہ کی جانب سے کنسائمنٹس کی ان بانڈنگ کے لیے پوسٹ ڈیٹڈ چیک یا انڈیمنٹی بانڈز کی شکل میں ٹیکسز کی سیکورٹی فراہم کیے جانے کے بعد کسٹم اسکارٹ کی شرط ختم کی جائے۔ جوائنٹ سیکرٹری حسن شیخ نے کہا کہ کیئر کلکٹوریٹ میں کلیئرنس 20 سے 25 روز تاخیر معمول بن چکی ہے جس کی بنیادی وجہ کیئر میں علیحدہ ایڈجوڈیکیشن سیکشن کا نہ ہونا ہے۔ توفیق چٹنی نے کہا کہ درآمد کنندہ کی درست ڈیکلیئریشن کی یقین دہانی کے لیے گڈز ڈیکلریشن فائل کرنے سے قبل سیکشن 79 کے تحت کسٹم ایجنٹس کو کنسٹائمنٹس کی ایگزامینیشن کی اجازت دی جانی چاہئے۔ اس موقع پر چیف کلکٹر منیر قریشی نے ان بانڈنگ میں سیکورٹی فراہم کیے جانے کے بعد کسٹم اسکارٹ کی شرط ختم کرنے اور کسٹم بانڈڈ ویئر ہاوٴسز کو 24 گھنٹے سروسز جاری رکھنے کی ہدایات دی اور کلکٹرز اپریزمنٹ و کیئر اور پروجیکٹ ڈائریکٹر کو ہدایت کی کہ وہ ایسوسی ایشن کی نشان دہی پر دیگر مسائل کو بھی فوری حل کیا جائے۔