کمیونٹی پولیس کا 50رکنی دستہ اے ایس ایف اکیڈمی میں ٹریننگ کیلئے روانہ



کراچی (اسٹاف رپورٹر) سٹی ڈسٹرکٹ گورنمنٹ کراچی کی کمیونٹی پولیس کی ٹریننگ ایئر پورٹ سیکورٹی فورس اکیڈمی میں ہوگی جس کے لیے 50 افراد پر مشتمل پہلا دستہ پیر کو 3ماہ کی ٹریننگ کا عمل شروع کرے گا۔ سٹی ناظم کراچی سید مصطفی کمال نے کمیونٹی پولیس کے پہلے دستے سے ٹریننگ کیلئے روانہ ہونے سے قبل ملاقات کی۔ اس موقع پر ڈی سی او کراچی جاوید حنیف، ای ڈی او میونسپل سروسز مسعود عالم اور کمیونٹی پولیسنگ کے چیف میجر(ریٹائرڈ) عمران محمد خان بھی موجود تھے۔ سٹی ناظم نے دستے سے خطاب کرتے ہوئے کہا کہ کمیونٹی پولیسنگ دنیا کے تمام بڑے شہروں میں موجود ہے۔ ایس ایل جی او اس بات کی اجازت دیتا ہے کہ سٹی حکومت میونسپل قوانین کے نفاذ کے لیے کمیونٹی پولیسنگ کا محکمہ قائم کرے۔ کراچی جیسے دنیا کے بڑے شہر میں اس کی ضرورت ایک عرصے سے محسوس کی جا رہی تھی جس کے پیش نظر سٹی ڈسٹرکٹ گورنمنٹ کراچی نے شہریوں کی جان و مال کی حفاظت اور بہتر نظم ونسق کے قیام کیلئے کمیونٹی پولیسنگ کو متعارف کرانے کا فیصلہ کیا جس کے مستقبل میں مثبت اور خوشگوار نتائج سامنے آئیں گے۔ انہوں نے کہا کہ کراچی میں حال ہی میں ہونے والے ہنگاموں کے دوران تقریباً ایک ہزار سے زائد گاڑیاں جلائی گئیں اور فیکٹریوں میں لوٹ مار اور املاک کو نقصان پہنچایا گیا۔ اس موقع پر کمیونٹی پولیسنگ کی کمی شدت سے محسوس کی گئی اگر اس وقت کمیونٹی پولیسنگ کا دستہ تمام اختیارات کے ساتھ سڑکوں پر موجود ہوتا تو شہر کو حالیہ تباہی سے کافی حد تک بچایا جاسکتا تھا۔ ناظم کراچی نے اس موقع پر ٹریننگ کے لیے منتخب ہونے والے کمیونٹی پولیسنگ کے اہلکاروں کو یقین دلایا کہ ان کو بہترین پیکیج کے علاوہ کمیونیکیشن کا موٴثر نظام اور آلات اور گاڑیوں سمیت دیگر سہولتیں فراہم کی جائیں گی اور اچھی کارکردگی پر مالی انعامات بھی دیئے جائیں گے۔ سٹی ڈسٹرکٹ گورنمنٹ کراچی کے محکمہ میونسپل سروسز نے کمیونٹی پولیسنگ میں بھرتی کیلئے600 اہلکار منتخب کیے تھے جن میں سے پہلے بیج کے50 افراد پر مشتمل دستہ ابتدائی فٹنس کا مرحلہ طے کرنے کے بعد ایئرپورٹ سیکورٹی فورس(asf) کے زیرنگرانی تین ماہ کی ٹریننگ حاصل کرے گا۔