کوہاٹ(جنگ نیوز،ایجنسیاں)کوہاٹ میں آرمی پبلک اسکول کے قریب فوارہ چوک میں پیر کو زیر تربیت نوجوانوں پر ایک خود کش حملے میں 12اہلکار جاں بحق جبکہ 4 شدید زخمی ہو گئے۔پاک فوج کے ترجمان میجر جنرل وحید ارشد نے دھماکے میں 9 سیکیورٹی اہلکاروں کے جاں بحق اور چارکے زخمی ہونے کی تصدیق کردی ہے۔زیر تربیت نوجوان فٹبال میچ جیتنے کے بعد خوشی مناتے ہوئے اپنی یونٹ آرہے تھے کہ اس دوران ایک خودکش حملہ آور نے ان کے درمیان گھس کرخودکودھماکے سے اڑا دیا۔ عینی شاہدین کے مطابق خود کش حملہ آور نے چادر اوڑھ رکھی تھی اوراس نے اہلکاروں میں گھس کرخودکو اڑایا۔زخمیوں کو سی ایم ایچ کوہاٹ منتقل کردیا گیا ہے۔ دھماکے کے بعد سیکیورٹی فورسزنے چھاؤنی کوسیل کردیا ہے۔ میجرجنرل وحید ارشد نے بتایا کہ جاں بحق ہونے والے فوج کی مقامی فٹبال ٹیم کے کھلاڑی تھے جو میچ جیتنے کے بعد سڑک پرجارہے تھے کہ خود کش حملہ آور نے ان کے درمیان آکر خودکو دھماکے سے اڑا دیا۔ دریں اثناء صدر پرویزمشرف نے کوہاٹ چھاؤنی میں خودکش حملے کی شدید مذمت کرتے ہوئے اس میں سیکیورٹی فورسزکے اہلکاروں کی قیمتی جانوں کے ضیاع پر گہرے دکھ اور افسوس کا اظہارکیا ہے۔ صدر کو وہاڑی میں اس واقعہ کی اطلاع دی گئی۔ صدر نے کہا کہ مٹھی بھردہشت گرد عناصر ملک کو عدم استحکام کا شکار کرنے کی کوشش کررہے ہیں مگر ان کی سازشیں ناکام بنا دی جائینگی اور قانون نافذ کرنیوالے ادارے ، پولیس اورعوام کے تعاون سے ایسے عناصرکوبے نقاب کرکے دم لینگے۔ انہوں نے کہاکہ سیکیورٹی فورسزپرحملے بزدلانہ ہیں اور یہ وطن دشمن عناصر کی کارروائی ہے جوپاکستان کی ترقی اور اعتدال پسندی کے مخالف ہیں۔ صدر نے واقعہ میں زخمی ہونے والے سیکیورٹی اہلکاروں کو علاج کی بہترین سہولیات فراہم کرنے کی ہدایت کی اورواقعہ میں شہید ہونیوالے سیکیورٹی اہلکاروں کے لواحقین سے بھی اظہار تعزیت کیا۔

__________________